الجمعة 10 أبريل 2020
رئيس التحرير
عصام كامل

كابتن ماجد: بلاها أهلي وبلاها زمالك

كابتن ماجد
كابتن ماجد

وآدى النشاط الرياضى أتوقف، والدوري أتوقف، والكأس أتوقف، ودوري الأندية الأفريقية كمان أتوقف، علشان ترتاحوا.. وعلشان رئيس الزمالك يبطل مناكفه في اتحاد الكورة والاتحاد يبطل مناكفه في الأهلي وعلشان سيد عبد الحفيظ يرحمنا.



وأهلا بالكورونا اللى قدرت تسكتكم هس هس كلكم على بعض، ربنا يجعل كلامنا خفيف عليها وتورينا عرض أكتافها وترحل من بلادنا في سلام لا آذية ولا مؤذية.

الملفت للنظر أن اتحاد الكرة أعلن تعليق نشاط كرة القدم لمدة 15 يوما، قال يعنى عارفين مواعيد سفر الكورونا، بينما رئيس الوزراء قرر تعليق الأنشطة الرياضية لأجل غير مسمى، وهو ده الكلام المظبوط والمريح بكل صراحة وياريت يقفلوا قناة الأهلي وقناة الزمالك خلال فترة الكورونا علشان إحنا مش ناقصين.. يعنى بلاها أهلي وبلاها زمالك.

اللى يغيظك بقا -لأ دا اللى بيغيظنى أنا- إن رئيس الزمالك ورئيس الأهلي طالعين يتكلموا عن التأجيلات في الوقت اللى الدوري فيه موقوف، ويا عالِم إذا كان هيرجع أم أنه سيُلغى والدوري يروح هدية للأهلي على رأى المستشار مرتضى منصور، وكمان ياريت نحمد ربنا إن معسكر المنتخب الأوليمبي اتلغى لأن المعسكر مش هيبقى فيه تدريب أصلا وما فيش غير سيرة "محمد صلاح" هيلعب في الأولمبيات ولا مش هيلعب.. ياعم سيبونا في حالنا وأدونا شوية راحة بقى.

Last Update : 2020-03-19 01:13 PM # Release : 0067