رئيس التحرير
عصام كامل
Advertisements
Advertisements
Advertisements

إسماعيل ياسين في فيس بوك: آه يا دهوتى السودة يانى يا مااااااما

إسماعيل ياسين
إسماعيل ياسين

وقال على رأى المثل: "مولد وصاحبه غايب".. آه والنبى ياخويا فيس بوك دا ما هو إلا مولد وصاحبه مش موجود بتاتا البتة.. دا أنا حاسس إن أمخُخى سوف يخرج من أدمُغى ويرحل دون عودة.. آه والنبى أنا دماغى هتدشدش من اللى بشوفه في هذا الفيس بوك.. الكل بيهرى في المهرى وأنا ياخويا بتفرج على مهلى وطالع ميتين أهلي.. الناس اللى على الفيس بيفهموا في كل حاجة.. في السياسة والفن والكورة وكمان في الدين.. آه والنبى فاهمين حتى لو مش فاهمين.. أهو كل واحد بيشوف "بوست" مش فاهمه بياخده كوبى ويشيره على إنه خبير إستراتيجي وخصوصا البنات والستات.

ساخرون.. إسماعيل ياسين في مهرجان التسوق: آه يا خراب بيتك يا سمعمع

آه يا دهوتى السوده يانى يا ماااااما.. أين أنتِ يا حقوق الملكية الفكرية من هذه المهلبية.. دا الست من دول يادوب تخلص طبيخ للعيال وتجرى عالفيس علشان تبدى رأيها في كل حاجة.. قال إيه ياسيدى بقا لها معجبين بيستنوها من التنابلة اللى حاطين إيديهم على اللايك عمال على بطال.

والنبى ياخويا أنا بيصعب عليا الراجل اللى بيكتب بوست هو عصارة أفكاره ونتيجة ثقافاته ومحدش يعبره بلايك يوحد ربنا.. قوم إيه واحدة ننوسة عين أمها تدخل بدم بارد لتقول له "البوست دا عاجبنى وأنا هسرقه".. قال يعنى بكدا أخدت الملكية الفكرية.. وبدون انتظار لرد الراجل إذا كان هيسمح أو لا يسمح تلاقيها حادفة البوست على صفحتها وهاتك يا تعليقات ويا لايكات من شوية المهووسين بصورة البروفايل بتاعها اللى هي مش صورتها أصلا!

قوم إيه الراجل الأولانى صاحب البوست الأصلى تصعب عليه نفسه ويصاب بالاكتئاب نتيجة الحسرة على حاله.. وقد يؤدى هذا إلى أنه يقوم بتطليق الست حرمه بدون إبداء أسباب.

ماحدش عايز يحسس التانى أنه مجرد قارئ.. فكلنا هنا مفكرون ومبدعون وماحدش احسن من حد.. أما قادة الرأى الحقيقيين من الكُتاب والمُفكرين، فهؤلاء استسلموا للعامة واصبحوا لا ينشرون سوى الأدعية الصباحية والمسائية ويترحموا على الموتى ويباركون لبوستات الزواج واحيانا الطلاق.. وأنا مش هطول اكتر من كدا علشان شلاضيم بُقى وجعتنى.. السلامو عليكوووووووووووو

Advertisements
الجريدة الرسمية