الجمعة 3 أبريل 2020
رئيس التحرير
عصام كامل

إسماعيل ياسين في الفلانتين: طب والنبى ده شكل ينحب؟!

اسماعيل ياسين
اسماعيل ياسين

إننى أشعر بالتوهان، شلاضيم بُقى لا تحتمل، يا خسارة شلاضيمك يا سمعمع، الولية مراتى بقالها كام يوم بتزغرلى وأنا معرفش ليه؟! وحصل إيه؟! وماذا تنتوى؟! أو ماذا تضمر لى من شرور؟!



 كل شوية تزغدنى وتقولى: ياترى يا سُمعة يا حبيبى إيه اللى غيرك وخلاك بالشكل اللى أنت عليه ده.. وهكذا حالها كلما ترى شلاضيمى، وأنا أقول لنفسى إيه الولية المجنونة دى.

 

أتاريه قال إيه "عيد الحب" كان يوم الجمعة اللى فاتت وانا ماجبتش دبدوب ولا حتى شبشوب، لا والنبى إيه، طب شى لله والنبى يا سيدنا الفلانتين يا ساكن قلوب الدباديب.. حب إيه اللى أنتى جاية تقولى عليه يا ولية يا أم عقل مهلبية؟!.. ده إحنا يادوب بنقول عشانا عليك يا رب

إسماعيل ياسين في محافظة أسوان: إننى أشعر بالانزعاج

الستات بيقلدوا بعض على فيس بوك ونازلين تنقير على أنفخ الرجالة قال إيه لازم الدبدوب الأحمر ييجي وإلا فلا.. طب يا أختي فلا وألف فلا.. "وإن شاء الله حتى تفلفلي فلفلة".. ده أرخص دبدوب في السوق بـ500 جنيه.. يعني لو عايز دبدوب عليه القيمة يبقى لازم يكون معاى 1500 جنيه.. كل جنيه ينطح جنيه.

 

الدباديب كنا بنجيبها لما كنا بنوفر من مرتباتنا والدولار كان بـ8 جنيه.. دلوقتى مرتباتنا يا دوب نأكل بيها العيال يا أم العيال.. الولية محسسانى إن الحب بيدلدق منها وأنا اللى ولا على بالى.. طب والنبى ده شكل ينحب؟!..

بتحبى لحمة راس يا ولية يا لولبية؟!.. كل ده علشان ماقولتيش لصاحبتك عالفيس إن جوزك الأهبل جابلك دبدوب أحمر بنص راتبه واتحرمتى من نشر صورة الدبدوب على صفحتك؟

إسماعيل ياسين في قناة الشرق: هنضرب الودع ونخبط عالحلل ونصفر بالصفافير

يا ناس حد يزرر لى بقى علشان اسكت.. ده إحنا عايشين بستر ربنا.. يا ولية ده الدبدوب أحلى منك أصلا.. طب لو راجلة انشرى صورتك مع الدبدوب وانتى هتشوفى رد الفعل.. طب ورحمة بُقى ما هتلاقى لايك يوحد ربنا

دى الحكومة لو عرفت إننا بنجيب دباديب للنسوان هتغلى علينا كل حاجة.. ومش هنلاقى نتعشى أصلا.. إننى لا أقوى على الكلام أكثر من ذلك فدعونى انقشع.. يلا بقا.. سلامو عليكوووووووووووو

Last Update : 2020-03-19 01:13 PM # Release : 0067