مصر بـ"تتنيل" بينا
بعيد عنك وبعيد عن السامعين. وأنا يا مبارك بقلب في المدعوق الفيس بوك لقيت صديق ناشر صورة لفضيلة الشيخ المحاسب الإخواني اللي ابتدا حياته نص أقرع وبقُصة. وبعدين ربنا كرمه وزرع شعر ولبس بدلة سينييه بعد تيشيرتات الموسكي المضروبة أم ٣ برايز، وبقي بيستحمي بصابونة بريحة وشامبو بالنخاع بعد ما كان بيعمل لمية الغسيل ريسيكل..
وهو متصور وحواليه قيادات كلية الشرطة وطلبة سنة رابعة، بعد ما حضرته اداهم محاضرة تثقيفية في الفداء والتضحية في الإسلام. هالني هذا الخبر. أيوه والله زي ما بقولك كده . هالني. يعني لمؤاخذة كده كبس علي مراوحي وحال دون قدراتي العضلية علي اللطم.
أبص وأدقق يمكن الخبر غلط ... لأ مش غلط. هو .. ابن الاخوان اللي بيعظم في الإمام الشهيد حسن البنا. واللي لم ملايين من الشحاتة في الخليج وهو بيستنجد بيهم عشان يمد مواسير مية للستات الفلاحات الغلابة عشان ميعملوش حمام في صفايح جوه البيت (والله العظيم قال كده) ولهف الفلوس وعمل نيو لوك شفتشي، وبقي دلوعة القنوات وبنبونة الفضائيات.
والنبي حارسه وصاينه كتكوت الدعاة الذي تكتمل به الدائرة مع جوز الفنانات اللي ما بتعيشلوش جوازات . واللي بيدفع دم قلبه لكوافير وباديكير المدام بعد ما لبس بنات مصر ولبسنا الطرطور، وإلي جوارهم حتي تكتمل الصورة. الصدر الأعظم بتاع إعلان "الفياخ الموسيمة المؤمنة اللي ح تدخلك الجنة ومش ح توديك الناااي” ياااااادي النيلة. هو ده اللي بتخلوه يحاضر في طلبة الشرطة وبتعملوا منه رمز إسلامي ؟؟؟؟؟؟.
هما دول اللي بتصدروهم في المشهد لتصحيح المفاهيم، جنب المسهوك أبو مجانص الطري اللي بيقول تهنئة المسيحين كفر بين. والست الكُمل أستاذة الشريعة اللي بتقول اغتصاب الأسيرات واجب عشان نذلهم ونكسر نفسهم.
وح نستعجب ليه؟ ما هو الأفندي الشيخ المحاسب وبقية شلة المشهد ما يقلوش نيلة عن المذيع المبطرخ اللي طلته علي الشاشة وهو بيستعرض إنجازات البلد، متفرقش عن طلة وصوت سنية المعددة في خناقة بلدي في حارة درب كواكة. واللي للأسف عندنا منه أكتر من نسخة علي أغلب الشاشات نفس الردح ونفس صوت عمود الكرنك المكسور في طلعة كوبري السيدة عيشة.
أما إذا أردت أن تستشعر “النيلة” علي حق فلا بد أن تشاهد المذيع اللوذعي فريد عصره وأوانه، اللي قرر يحتفل بعيد ميلاد الرئيس علي الهواء بدباديب و تورتة وجاب شعبولا يغني هابي بيرز داي تو يو، وسط مجموعة من المعاتيه في وصلة هبل سيتوقف عندها التاريخ طويلاً ليسكب علينا مزيداً من النيلة.
نعم هي الوكسة اللي اتبلت بيها البلد والزمن الأغبر، اللي الباز أفندي فيه بقي دكتور وبيدينا دروس في الأخلاق والوطنية وطريقة عمل المهلبية. وحمو وشطة وكزبرة وأبو ليلة ووزة بقوا فنانين.
لستة كبيرة من الأسماء المتصدرة المشهد والتي يستطيع معها أصغر ضابط مباحث على أصغر كمين مرور يسحبهم تحري وهو مطمئن السريرة.
مصر بتتقدم بمشروعات جبارة وطموح يناطح السحاب وعزيمة رجال ليل نهار. وبتتنيل بخيبة شعب وغباء جاهل أو متعمد بيجرها لورا. وبنتكلم وبنهاتي وح نفضل نهاتي ياعم .. ياللي فرضت علينا الأشكال دي .. يا عم .. اسمع يا عم إنت ... خالك تعبان في مستشفى أم المصريين. ... سامعني؟؟
