خالد سالم يكتب: "يا عم يا بتاع الإعلانات"
ارحمني.. أنا اسهر وابات
حملاتك الراقصة بالأغاني والحركات
أتفرج وانبهر من سكات
واتقهر من الحاجات
تقتلني التطلعات
في تحكم الإعلانات
الواد وأمه والبنات
أوامر وطلبات
وأنا أحاسب من سكات
على الطلبات
ياعم يابتاع الإعلانات
أنا في الديون ببات
إشي.. إشي
حاجات ومحتاجات
شقة سوبر لوكس.. والعفش والأجهزة
بكرة تستلمها.. وفيها تبات
عربية آخر موديل.. وتكييفات
تشتري واحدة.. والتانية في حضنك تبات
وعروض فنية من النجوم والنجمات
وفلوسك للغلابة نصيب.. فين التبرعات
والسوق حالة انفلات
موبايلات.. ثلاجات
غسالات.. سخانات
وقسط على سنة الدفعات
المرتب.. يوم اتنين مات
يا عم يا بتاع الإعلانات
على دماغي شغال خبطات
في الجرائد والراديو والشاشات
حصار كامل وانا في الهم ابات
الرحمة حلوة.. خف من التخفيضات
وأجهزتك شهرين وفي الصيانة تبات
ونشتري غيرها ونخسر القرشينات
كان زمان الجهاز يورث من الجدات
يلعن أبو الطمع في تجار الإعلانات
يا عم يا بتاع الإعلانات
مهما تعمل.. وتنفذ حملات
معاك في حدود الإمكانيات
بالإعلانات بتهرب من الضرائب والحجوزات
وبتنكد علينا في الأفلام والمسلسلات
