كابتن ماجد: بلاش نكدب على بعض
بمناسبة إن ماتشات الأدوار التمهيدية لبطولتى دوري أبطال أفريقيا والكونفدرالية انتهت.. ويمناسبة إننا هندخل في الجد.. فأنا عندى كلمتين واقفين في زورى وعايز أقولهم.
ياريت بلاش تشجع الزمالك وأنت أهلاوى لمجرد أنه بيلاعب فرقة مش مصرية.. وبرضو مش لازم تشجع الأهلي وأنت زملكاوى حتى لو كان بيلعب ضد فريق من بلاد الواق واق.. لأن مافيش حد بيحب أن المنافس التقليدى بتاعه يفوز على أي حد بتاتا البتة.
يعنى أنا كأهلاوي لو حضرت تمرينة للزمالك فيها تقسيمة بين مجموعتين هتلاقينى مش عايز ولا مجموعة منهم تفوز على التانية.. وأظن الناس الطبيعيين في مختلف أنحاء العالم زى حالاتى كده.. سايبين نفسهم بدون تعقيدات ولا تكليفات من عينة أنا هشجع الفرقة اللى بتنافسني لمجرد إنها بتلاعب فرقة أخرى مش مصرية.
دى حاجات عفا عليها الزمن كان قد ابتلانا بها بعض الإعلاميين والصحفيين ومعلقي المباريات خلال الأعوام الطويلة الماضية.. حتى تمكنت منا وأصبحنا نشعر بالعيب والخيانة إذا ما أعلنا أننا نشجع فريقا أفريقيا أو عربيا أثناء لعبه ضد منافسنا المصرى التقليدي.
أرى أن هذه الحالة مصرية بامتياز لدرجة أنهم ربطوها بالوطنية.. وأنا مش عارف إيه الوطنية في إنى أشجع فرقة مش بحبها غصبا عنى لمجرد أنها بتلاعب فرقه مش مصرية.. فياريت بلاش نكدب على بعض أكتر من كدا.
