إسماعيل ياسين في الديوان: مراتى اسمها حنفى؟!
إننى أشعر بنخاشيش أدمُغى توشك على الإنبلاج.. آه يا أدمُغى يانى يا سمعمع.. قال إيه ياخويا لسه فيه ناس بتتكسف من ذكر اسم أمهاتهم ومراتاتهم في الأماكن العامة ودواوين الحكومة.. ده حتى في المستشفيات برضو بيتكسفوا.. وتلاقى الواحد منهم بيركبه 100 عفريت لما حد يسأله عن اسم الست الوالدة أو اسم مرات حضرته.. وإذ فجأة تلاقى دماغه سخنت والبخار بيطلع من نخاشيشه.. آه والنبى زمبقولكم كده.. ده فيه ناس كتير وأنا واحد منهم في نفس الغباوة دى.. لكن للأمانة أنا أختلف عنهم شويتين.. فليس منهم من له مثل شلاضيمى ولا له بُق مثل بُقى.
آه يا شلاضيمى يانى يامااااما.. الممرضة اللى بتاخد أسماء العيانين في المستشفى صوتها بيتنبح مع الواحد من دول علشان يديها اسم مراته، وتلاقيه واقف مستلوح زى الطور ومش عايز يرد.. وراسه وألف جزمة أنها تكتب "مدام حنفى" قدام خانة الاسم.. طب أم سعادتك اسمها إيه؟!.. برضو اسمها حنفى.. فأنا لا أكشف عن اسم أمى ولا اسم مراتى بتاتا ألبتة
طب يا هباب البرك أنت مكسوف من اسم مراتك وأمك ليه.. هو أنت ماتعرفش أن مرات سعادتك أو أم حضرتك ممكن تكون موظفة وزمايلها بينادوا لها باسمها عادى؟!.. هو أنت فاكر أن العميل اللى بيروح لها الشغل بيقولوله روح لمدام "حنفى" مثلا أو روح لأم حنفى؟!.. لا يا روح الست والدتك دول بيقولوله روح للأستاذة مديحة، وأنت بتبقى برة القصة خالص.. قال مدام حنفى قال.. الله يخسفك في سابع أرض يا دى الجدع ياللى بتتكسف من اسم أمك ومراتك.. آآآأأخ يا ما نفسى أدب صباعى جوه عينيك.. ياما نفسى أجيب فنجان شاى سخن بيغلى وادلقه فوق نافوخك.. يا راجل يا أجوف يا مجفف.. محسسنى إن الموظف أو الممرضة هيسرقوا اسم أمك؟!.. ياخى جاتها ستين نيلة اللى عايزه خلف يشبهك يا سى حنفى.. أنا شلاضيم بُقى وجعتنى ولن أكتب في هذا الموضوع أكثر من ذلك.. يلا بقى.. سلامو عليكوووووووووووووو
