"كان_بيحلم_باليوتوبيا ! ".. قصيدة للشاعرة مروة السروجي
كان موظف جاى جديد
حب يعمل ثورجى
يمشى بنظامه الشديد
جوه تشكيل عصبجى
كل غلطة يشوفها يكتب
مرة تقرير.. مرة شكوى
مرة في مديره اللى ينهب
مرة في الأستاذة سلوى
قال بتيجى الساعة 9
بعدها بساعتين بتمشى
والمدير بفساده يسعى
واللى جاى عليه بيرشى
ينصحه الأستاذ خميس
ف النظام أصله قديم
يا ابنى بقى خليك حسيس
خد كلامى في الصميم
الغلط قوله عواف
وحط على بقك لجام
والضمير اديه انصراف
يبقى كله في التمام
واهدى كده.. خليك حويط
ده اللى بيروح مش بيرجع
وامشى أحسن جوه حيط
ألا ده الكرباج بيلسع
أما جو إنك تزيط
ع الفساد وتعيش ب فوبيا
تبقى لا مؤاخدة عبيط
أو بتحلم باليوتوبيا !
جدير بالذكر أن المهرجان الدولي همسة للآداب والفنون كرم الشاعرة مروة السروجي، من مواليد محافظة أسيوط، عن مجمل أعمالها الشعرية وباعتبارها من النماذج الشابة الواعدة في صعيد مصر في مجال شعر العامية والفصحى.
