"المدرس لازم يرحل".. غضب نشطاء السوشيال بسبب واقعة تبول طالبة المنصورة
حالة من الغضب انتابت نشطاء مواقع التواصل الاجتماعي "فيس بوك وتويتر"، بعد منع عضو هيئة التدريس بكلية الآداب جامعة المنصورة طالبة من دخول الحمام، أثناء أدائها للامتحان، مما تسبب في تبولها على نفسها، وبالرغم من قرار رئيس جامعة المنصورة إحالة صاحب الواقعة للتحقيق، واستبعاده من أعمال المراقبة والكنترول، لكن نشطاء مواقع التواصل الاجتماعي طالبوا بمعاقبة المدرس، لتسببه في أذى نفسي للطالبة.
وعبر محمد جابر عن استيائه قائلًا: «حاجة تخرج الواحد عن شعوره ما يمكن تكون مريضة وتاخد أدوية معينة بتسببلها الحالة دي.. إيه منظرها وشكلها قدام زمايلها وهي فوق سن الـ20 ويحصلها موقف زي دا»، وتابع عمرو مخلوف: «المفروض يتم فصله عشان يكون عبرة لمن لا يعتبر».
في حين ردت سالي غنام: "طب ماهي الوزارة اللي حاطة القرار ده ولا الإدارات بتقول كلام من عندهم؟".
وعلق محمد عاطف أحمد: "الناس بتموت على نفسها والمراقبين فاكرين نفسهم في الثانوية ويقولك مفيش حمام في الامتحان المفروض الوزارة تنزل قرار تشوف التهريج ده".
أحمد كاجا طالب بفصل المدرس قائلا: "المفروض فصل من العمل لأنه عمل مهين للإنسانية والرحمة".
ووافقت أمل عبد الحميد على طلب إقالة المدرس قائلة: "إقالة يا بني آدم.. ده لو كان اتكلم مع حد تعرفه بطريقة سيئة كان زمانه اتفصل ده قرار مع حجم الكارثة إيه الاستخفاف ده.. يعنى نفسية البنت إيه دلوقتى.. كل أساتذة الجامعات كلهم كبر واستعلاء ونفخة كدابة كأنهم طبقة غير الطبقة إلا من رحم ربي".
في حين بررت وفاء أحمد ما قام به المدرس قائلة: "في طلاب بتستغل ده في الغش بيكون الطلاب كلهم عايزين الحمام طيب وإيه الحل طبعا في ناس بتتظلم نتصرف إزاي".
وابتدرها عاطف الدواخلي: "على الطالب أو الطالبة استخدام الحمام للضرورة وخصوصا إن كان مريضا مع وضع كل أدواته على الديسك ويصطحبه أحد الملاحظين لحين عودته وتحديدا لمنع الغش".
أما وليد يوسف فرفض تبريرات المنع قائلًا: "دا لازم إجراء تأديبي أشد لا يوجد أي لوائح تمنع أي طالب من الذهاب إلى الحمام أثناء الامتحان حتى لو شك المراقب أنه ممكن يغش، ليس من حقه منعه".
وقال إسلام حنفي: "دا نموذج صغير من باقي الناس في الجامعات عندنا قصص وروايات تقدر تتكتب عما يفعله عضو هيئة التدريس في الجامعة مع الطلبة".
وعلق عادل حسين قائلا: "مهما يكن لا عذر له خاصة وأنها أخبرته أنها تعاني من بعض المشكلات الصحية".
وكانت كلية الآداب جامعة المنصورة استبعدت مدرس بقسم الصحافة والإعلام من المراقبة والكنترول بعد منعه طالبة وأم لطفلة من دخول الحمام لمدة 3 ساعات كاملة (وقت الامتحان) حتى تبولت على نفسها داخل اللجنة أمام الطلاب، الأمر الذي أصابها بحالة من الحرج الشديد أمام زملائها.
