نهى الصيفي تكتب: عن السوشيال ميديا أتحدث

الواحد مننا لما بيفكر يتصور بيكون عنده سبب مقنع جدا له هو شخصيا، عاجبه شكله وحابب يتصور، لابس طقم جديد وشايف أنه حلو وعايز يتصور، في مكان جميل وفكَّر ياخد صورة للذكرى، قاعد وسط ناس بيحبهم وفرحان بوجوده معاهم وعلشان كده قرر يوثق اللحظة، المهم أنه مبسوط بجد وهو بيتصور وهايكون مبسوط اكتر لما ينزل الصورة دى والناس تشوفها وتعلق عليها بكلمات طيبة وحلوة..

زمان قبل السوشيال ميديا، كنّا لما نشتري لبس جديد بنشيله علشان نلبسه أول يوم العيد مثلا أو في خروجة حلوة مع أصحابنا، أو في أي تجمع عائلي ومناسبة سعيدة، كنّا بنعمل ده متعمدين علشان عارفين أن شكلنا حلو ومرتب، وطبعا مستنيين نسمع كلمة حلوة ونشوف نظرات الإعجاب في عيون الناس اللي قلوبها بيضا وطاهرة أو حتى نشوف نظرات الغيرة في عيون الحاقدين، المهم أن احنا بنعمل ده واحنا مستنيين تعليق معين من الناس اللي بتشوفنا.. يعنى ده أمر صحي جدا وطبيعي جدا جدا.

النهاردة بقى لما اشوف واحد طيب وجميل منزل صورة له على أي وسيلة من بتوع السوشيال ميديا، سواء لوحده أو معاه فيها أهله أو أصحابه أو حتى ولاده أو متصور في مكان جميل وفرحان بالصورة وعاملها بروفايل، أكيد هو مستني يشوف تعليقات الناس اللي حابب أنه يشارك معاهم الصورة، وحابب يشوف كلمتين حلوين حتى لو كانوا مجرد مجاملة رقيقة من ناس مش مقتنعة باللي هو بيعمله أصلا، باستغرب جدا جدا لما الاقي واحد سخيف من اياهم يروح عامل ايموجي على صورة واحد صاحبه، مالك يا حضرة المواطن الغلس قوي؟! شُفت أراجوز قدامك ضحكك قوى كده؟! وللا فيه قرد بيزغزغك قاعد جنبك، فهِّمني بس علشان استوعب ايه رد فعلك الغريب ع الصورة ده، ما هي لو مش عاجباك بلاش تعلق عليها خالص، لو مش بتحب صاحبك ده وهو أساسا مش صاحبك وانت رخم ومصمم تفضل عنده وتراقبه رخامة يبقي خليك محترم وبلاش تعلق، ولو بجد انت نفسيتك سودة وماعندكش أخلاق طيبة خالص يبقى الأفضل ليك انك برضه ماتعلقش ع الصورة..

والله العظيم الكلمة الحلوة الطيبة مش هاتخسركوا حاجة، بل على العكس تماما، صدقني هاتاخد ثواب كبير انك كنت السبب في رسم ابتسامة حلوة على وش واحد المفروض انك تعرفه، وممكن تكون السبب في طاقة إيجابية كبيرة وروح حلوة تنقلها بين الناس، والأهم من ده انك لو استمريت في عمل ده ها تنقي نفسك وهاتبقي إنسان مختلف وهاتبدأ تشوف الدنيا من منظور مختلف مع مرور الوقت..
الكلمة_الطيبة_صدقة
الصور_مش_حرام
أنت_حر_ما_لم_تضر
شأنك_يغنيك
خليك_إيجابي وانضف من جواك بقى
اعقلوها لأن بجد الحياة عمرها قصير قوى وبلاش تكون سبب في حزن
خليك_رمز_السعادة