Friday, 13 December 2019
رئيس التحرير
عصام كامل

إسماعيل ياسين في صفقة القرن: الله يخسفك في سابع أرض يادى الجدع

 اسماعيل ياسين
اسماعيل ياسين


عقلى سيتوقف عن العمل.. آه يا وقعتى السودة يانى يامامي.. أنا مش عارف ياخويا يعنى إيه صفقة القرن وهباب البِرك اللى بيقول عليها المدعو "ترامب" ده.. ويقصد إيه من إنها هتنهى الصراع الإسرائيلى- الفلسطينى.. يعنى مثلا هتمشى الفلسطينيين من أرضهم المحتلة ولا أنت ناوى تاخد الإسرائيليين في إيدك وأنت ماشى علشان ينتهى الصراع والصداع اللى أنت عاملهولنا؟.. الله يخسفك في سابع أرض يادى الجدع.. إنها هزُلت وزبُلت وتنيلت بستين نيلة، والنبى ياخويا لغاية النهار ده لا أنا ولا غيرى فاهم حاجة من البتاعة بتاعت القرن دى.. بس أنا اللى غايظنى ومطير النوم من شلاضيمى هو أن ترامب بيقول إن الصفقة ماشية في طريقها السليم وحققت نتائج متقدمة.. طب حققت مع مين ولصالح مين ياعم أنت.. ده ماحدش فاهم عنها حاجة غير معاليك أنت والواد جوز بنتك اللى رايح جاى على إسرائيل ده!

آآآأأخ ياما نفسى أدب صباعى جوه عينك.. ياما نفسى أجيب فنجان شاى سخن بيغلى وادلقه فوق نافوخك.. يا راجل يا أجوف يا مجفف.. أنا مش عارف منفوخ قوى زى الديك الرومى كده ليه!

طب لو كنت بتفكر إن الفلسطينيين هيهاجروا لسيناء فأنت بتحلم أحلام يقظة، ولازم تتغطى حتى وأنت صاحى.. آه والنبى ياخويا زمبقولك كدا.. وسيبك أنت من حكاية التفكير خارج الصندوق وجوه الصندوق اللى داوشنا بيها دى.. لأنه لا رئيسنا ولا جيشنا المصرى هيسمحوا بكده.. وأدينا مستنيين بعد شهر رمضان علشان نسمع تفاصيل الصفقة وننجلى

أنا مش عارف يا خويا صفقة إيه تانى بعد إعلان القدس عاصمة لإسرائيل والجولان ولاية إسرائيلية!!.. طب يكونش ترامب عايز شلاضيم بُقى يديها للإسرائيليين علشان يعملوا جواها مصانع ونوادى ومفاعلات نووية؟!

ده حتى حق الحلم في العودة للفلسطينيين المهاجرين عايز يلغيه الرفضى ابن الرفضى.. دا ناقص ياخد منى العتبة الخضرا اللى دفعت فيها شقا عمرى.. يبقى كده حتما ولازما ولا بد إنى أروح ألم الإيجار بتاع المطافى قبل ما خونا ترامب يلهفها منى ويديها لنتنياهو.. يلا بقى.. سلامو عليكووووووووووووووو