Friday, 13 December 2019
رئيس التحرير
عصام كامل

إسماعيل ياسين بعد الاستفتاء على التعديلات الدستورية: شلاضيمى بترف وعقلى بيخف

اسماعيل ياسين
اسماعيل ياسين


أنا أعصابى تعبانة.. حاسس إن شلاضيمى بترف وعقلى بيخف.. أنا مش عارف الإخوة بتوع قنوات الجزيرة والشرق ومكملين حاطين مصر وشعب مصر والسُلطة في مصر في أدمغتهم ليه.. إنهم بالتأكيد يعانون من الانحطاط في المُخيخ الذي يجعلهم يسودون علينا عيشتنا صباحا ومساء.. قال إيه ياخويا مش عايزين الناس تنزل للاستفتاء

طب آدى يا حيلتها منك لُه لها كل الناس نزلت للاستفتاء ماعدا أقرانكم من الهاربين خارج الوطن ومن يشبهونكم بداخله.. ناس نزلت وقالت لأ وناس نزلت وقالت آه.. ياخى جاتك ستين آه تخرج من أضلعك

طب منظرك إيه دلوقتى بعد تأييد معظم الأحزاب للتعديلات الدستورية ونزولهم للاستفتاء؟!.. ده حتى حزب التجمع اللى هو بيعارض عّمال على بّطال أعلن تأييده للاستفتاء.. يا جدع ده الحزب الناصرى أعلن تأييده للاستفتاء.. طب النقابات المهنية كلها أعلنت ونزلت.. أجيبلك مين تانى يأيد علشان تنقشع وتكفهر يا أيها الهِر!!

والنبى يا شيخ أرجوك تنقشع وتتلاشى عن شلاضيمى وبلاش تنغص علينا العيشة وكفاية علينا المنغصات النسائية صباحا ومساء.. يا أخى ده حتى اللى رافضين للتعديلات نزلوا وعبروا عن رأيهم.. تقدر تقولى مشكلتك مع اللى رفض ولا مع اللى أيد ولا أنت عايزنا ماننزلش من البيت ونبقى سلبيين وهربانين زى معاليك اللى بتعلن عن رأيك من الخارج.. ده حتى المصريين في الخارج نزلوا يا جدع.. أنت مين.. أنت ليه.. أنت إزاى!!

يا أخى ده حتى صوتك بيعتبر دليل على أنك حي وحر وصاحب إرادة وشريك في القرار.. مش عايش في الدنيا جهجهونى كده.. يعنى لما متروحش تنتخب أو تستفتى وتهدر صوتك يبقى أنت بتقصر في حق وطنك ونفسك وأهلك وحتى في حق أبنائك.. آآآأأخ ياما نفسى أدب صباعى جوا عينك يا دى الجدع.. ياما نفسى أجيب فنجان شاى سخن بيغلى وادلقه فوق نافوخ أي مُذيع يطلع يهبد على قناة الجزيرة وكل إخوانى أجوف مُجفف منفوخ زى الديك الرومى.. آآآآآآآآخ يانى يا نفوخى يانى ياماماااااااااا.. إننى لا أقوى على المناهدة.. يلا بقى.. سلامو عليكوووووووووووووووو