إسماعيل ياسين في قناة مكملين: «جاتها ستين نيله اللى عايزه خّلف»
الله يخسفك في سابع أرض يا دى الجدع.. الواد "محمد ناصر" بتاع قناة مكملين ده مش هيبطل هلفطة أبدا.. قاعد مستلوح وعمال يهبد في كل حاجة وأى حاجة.. وأنا اللى كنت بصدق كلامه وبقول إنه شايل هموم الغلابة.. أتاريه بيكيد للحكومة والمسئولين في الدولة عمال على بطال، زى كيد النسا تمام.. ياخى جاتها نيلة اللى عايزة خلف من عينتك.. إنها هزُلت وذبُلت وتنيلت بستين ألف نيلة
آه والنبى يا خويا جاتها ستين ألف نيلة اللى عايزة خلف من عينة العيال بتوع الإخوان، وعينة الإعلاميين بتوع الإخوان، وعينة اللجان الإلكترونية بتاعة الإخوان اللى هللوا وفرحوا بعد سماع خبر استشكال وزارة التضامن لوقف حكم العلاوات الخمس لأصحاب المعاشات وهاتك يا تريقة على الحكومة والرئيس والدولة اللى بتاكل حقوق رعاياها
مع إنهم في البداية كانوا زعلانين من حكم المحكمة بأحقية أصحاب المعاشات في العلاوات الخمس، خوفا من تعاطف المسنين مع الرئيس "السيسي" ومع القضاء الذي أنصفهم ضد الحكومة.. هؤلاء الإخوان يفرحون لزعلنا من الحكومة ويزعلون لفرحنا بالحكومة.. إنهم خلف خلاف يا أبو الأخلاف
بصراحة قرار الرئيس السيسي بتوجيه الحكومة لسحب الاستشكال على حكم الإدارية العليا بشأن العلاوات الخاصة لأصحاب المعاشات كان ضربة قاصمة فضحت شماتة الإخوان حتى في أهالينا من كبار السن.. قرار الرئيس أعاد الأمور إلى نصابها، وصحح خطأ كانت قد وقعت فيه وزارة التضامن، عندما استشكلت على الحكم أمام محكمة الأمور المستعجلة.. وكأنه يقول للإخوان وإعلامهم: "اهرى يا مهرى وأنا على مهلى"
شابوه للرئيس.. وجاتك ستين نيلة يا أيها الإخوانى منك له له لها لها.. وزغردي يا سومة.. الشعب مأنتم مع الحكومة.. بس على الله تكون الإجراءات التقشفية انتهت خلاص ونبدأ كلنا نحصد نتيجة التقشف اللى عشناه في الكام سنة اللى فاتوا، ونفرح مع بعض زى فرحة أصحاب المعاشات بقرار الرئيس السيسي.. أما هباب البرك اللى مقضيينها هبد في قنوات الإخوان فليذهبوا إلى الجحيم.. ويلا بقى.. سلامو عليكوووووووووووووووووو
