كابتن ماجد: حسام البدرى.. كان بدرى عليك.. عليك بدرى
باين كدا والله أعلم إن أيام "حسام البدرى" في نادي بيراميدز أصبحت معدودة، علشان مافيش دخان من غير نار، والدخان بيشير إلى أن الزمالك سيستعين بالبدرى في حال إقالة مديره الفنى "جروس"، أما النار فما زالت تحت الرماد داخل كواليس بيراميدز.
وأنا ككابتن ماجد شايف إن حسام البدرى أخد في بيراميدز أكتر من وقته، دا "حسام حسن" بجلالة قدره لم يكمل شهرا واحدا ورحل إلى حال سبيله.. دا لو رئيس بيراميدز قاصد يقضى على تاريخ حسام حسن وشقيقه إبراهيم ما كانش عمل فيه كدا.. وأظن جاء وقت البدرى علشان يشوف حاله بدرى بدرى.
لكن الفرق بين حسام حسن والبدري أن الأول مالوش خدمات على بيراميدز.. بينما الثاني هو اللى تعب وجهز وأعد وشارك في الحلم والتنفيذ.. وعلشان كدا هيخرج بطريقه شيك.. وهى تدريب النادي المتصدر على قائمة الدوري المصرى.. وهذا هو الظاهر.. أما الباطن فكلنا يعرف أن رئيس بيراميدز ورئيس الزمالك راسين في طاقيه.. والأول عارف إن التانى لا يعيش له مدربين أكتر من شهرين أو ثلاثة بالكتير وبعدها تتم الإطاحة بالبدرى ليلحق بحسام حسن ويدخل مرحلة الاستجمام ويتشبرق بالمليون بتاع الشرط الجزائى.. ولله الأمر من قبل ومن بعد وكان بدرى عليك.. عليك بدرى.. وموعودة ياللى عليكى الدور.. وسلمولى على العميد "أحمد حسن".
