ساخرون.. إسماعيل ياسين في وزارة التنمية المحلية: آه يا خراب بيتك يا سمعمع
آه يا دهوتى يانى يابا.. أعوذ بالله من هذا الذي أراه.. أنا ياخويا هتجنن وحاسس إن شلاضيم بُقى عايزة تسيبني وتنزل تتمشى على الكورنيش.. قال إيه سيادة معالى وزير التنمية المحلية بيعين لكل محافظة متحدث رسمى.. ده غير المتحدث بتاع الوزارة نفسها.. ومتحدث في كل مركز من مراكز المحافظات.. وجايز يكون فيه متحدثين للقرى والنجوع والله أعلى وأعلم.
آه يانى يا غُلبك يا سمعمع.. ده أنا ناقص ألاقى في كل سوبر ماركت حاططلى متحدث رسمي يشرح لى فوائد البسطرمة والفرق بين الجبنة الرومى القديمة والجبنة الرومى الجديدة.
إننى في منتهى الاندهاش.. عقلى سيتوقف عن العمل.. طب ياخويا ماهو كل محافظة فيها مكتب إعلامي، ومدير علاقات عامة ومدير إعلام هو اللى بيتعامل مع الصحفيين والإعلاميين بقاله سنين وقرون وعهود ودهور.. إيه بقى لزوم المصاريف دى كلها على المرتبات والمكافآت والتعلب فات وفى ديله سبع لفات؟!
طب يكونش هذا المتحدث سيتعامل مع ناس تانيين غير الصحفيين والإعلاميين؟!.. أم أنه يتقاضى راتبا ضخما للتفرغ للرد على العيال بتوع فيس بوك مثلا، باعتبار أن مدير المكتب الإعلامي بالمحافظة مالوش في السوشيال ميديا؟! ده غير بقى المتحدثين الرسميين للهيئات والأندية والمستشفيات.. ومتحدثي المدارس والمتنزهات.
آه يا خراب بيتك يا سمعمع.. ده أنا متهيئا لى إنى هروح البيت ألاقى الست مراتى جايبة لى متحدث رسمى وحاطاه في الكوميدينو.. آه والنبى ياخويا وجايز تحطه لى في النيش علشان مايطلعش غير للضيوف.
والله إننى لأشفق على الرئيس "السيسي" ربنا يكون في عونه من أولئك الموظفين في دواوين الوزارات والمحافظات والمحليات.. ده أنا كل اللى أعرفه إن المتحدث الرسمى بيكون فقط في الجهات السيادية.. مثل رئاسة الجمهورية ورئاسة الوزراء والجيش والشرطة.. لكن متحدث في كل محافظة هي دى اللى مش داخلة أنفُخى بتاتا البتة.
عموما أنا سأنقشع.. وربنا يجعل كلامى خفيف عليكم.. يلا بقى.. سلامو عليكووووووووووو.
