ساخرون.. إسماعيل ياسين في وزارة التموين: ارحموا من في الأرض
آه يا دهوتى السودة يانى يابا.. ده أنا دماغى هتد دشدد لعشروميت حتة.. ولا أدرى ماذا أفعل وماذا أعنى ومن أين أبدأ أو أنتهى.. إننى أشعر بالدوران.. قال إيه ياخويا كل شوية وزارة التموين توقف لنا البطاقة وتطلب تجديدها.
طب يا سيدى أنت وهو وهى وهن وأولئك.. لازم تعرفوا إن الناس اتبهدلت من المشاوير رايح جاى لمكاتب التموين، علشان تعمل تظلمات تعيد المحذوفين منهم للبطاقات، بينما أنتم ولا أنتم هنا، ومقضينها تحديث بيانات عمال على بطال، إشى دفعة أولى، وإشى دفعة تانية وإشى تالتة ورابعة
طب يا عمنا منك له لها ماهى كل البيانات مكتوبة أهه، وأنت بقى اللى بتدونها غلط في كل مرة.. يعنى معقولة المواطن يفضل شهور منتظر حصته في العيش والدقيق، والكام سلعة اللى بيعيش عليهم علشان خاطر حضراتكم بتعدلوا في البيانات؟!
وكمان مقسمين الناس على دفعات، وشهر يسلم شهر، والناس بتاكل في بعضها قدام مكاتب التموين، وتقول عشانا عليك يا رب؟!
ده أنا شلاضيم بُقى دابت من كثرة الكلام في الحكايه دى.. آه يا شلاضيمى يانا يا ماماتى الناتى كوناتى.. كل شوية تحذفوا لى واحد من البطاقة وأنا أرجع أضيفه.. وفى آخر المطاف حذفتونى أنا.. آه يانا من ده الهنا.
تكونوش فرحانين بالاستمارات اللى بتوزعوها على الناس الغلابة وتاخدوا "جنيه" رسوم على كل استمارة؟!.. طبعا ياعم ما هو إحنا لو ضربنا 70 مليون محذوف أو مغلوط في بياناته في "جنيه" هيدينا 70 مليون جنيه في كل دفعة.. ماهى كل البطاقات فيها ناس اتحذفت وكلهم برضو رجعوا تانى بدون أي ستين لأزمة.
طب تكونوش بتغلطوا في البيانات بالعمد علشان المواطن كل شوية يعمل استمارة ويدفع جنيه؟!.. طب والله فكرة حلوة.. ده أنتم عباقرة بقى وبتوفروا فلوس للوزارة من جيوب الغلابة اللى الوزارة بتدعمهم والمفروض إنها بتوفر لهم الجنيه.
أعوذ بالله من هذا الذي أراه.. أين أنت يا حقوق الإنسان.. إننى في منتهى الانعياى.. ربنا يجعل كلامنا خفيف عليهم.. إننى أريد أن أقول لكم "ارحموا من في الأرض" أما أنا فيجب أن أنقشع الآن.. نعم سأنقشع.. سلامو عليكووووووووووووووووو
