أول صورة تكشف الطلب الغريب لتلميذ واقعة «عاوز أنام ربع ساعة يا حاجة»
كشف أحد أصدقاء أسرة الطفل، صاحب الفيديو الذي انتشر عبر مواقع التواصل الاجتماعي «فيس بوك»، وهو يبكي في إحدى المدارس قائلًا لمدرسته: «أنا عاوز أنام ربع ساعة بس يا حاجة.. عاوز أنام ربع ساعة والنبي، أنام ربع ساعة يا حاجة واعمل لكو اللي أنتو عاوزينه»، عن سر بكائه الشديد وطلبه للنوم.
ونشر صديق الأسرة، صورة للطفل بعد تجبيس قدمه لتعرضه للكسر قبل بدء الدراسة بوقت قليل، قائلًا :«بعد إذنكم يا جماعة محدش يقول عليه سرسجي وحلاقة شعره وأسلوبه، ده محمد ومش حالق أهو، بس هو كان رجله مكسورة وعامل عملية وبنحاول نراضيه وهو عنده 6 سنين وأول يوم في المدرسة يعني مش عارف يفصل بين المدرسة والشارع، الموضوع مش محتاج استظراف وكوميكس وطريق».
وأضاف: «الناس اللي داخله تقول أنه مش متربي وأن الأهل مهملة والمفروض أنه ينام بدري ده طفل يعني بينام براحته ويصحى براحته وبقاله فترة مش بينام بسبب رجله وبسبب العلاج فأكيد مش من أول يوم يصحى الساعة 7 الصبح هيقدر يقاوم إحنا كبار ومش بنقدر نقاوم إزاي طفل زي ده يصحى من الساعة 7 ويرجع الساعة 2، سيبتو اللي بيصور والأستاذة اللي ماسكة العصاية والأستاذة اللي بتزعق وأن الطفل بيعيط كده ومسكتوا في الحلاقة وكلمة يا حاجة ؟؟؟؟؟».
وتابع: «بيقول يا حاجة للي كانت جنب اللي بيصور مش للأبلة لأن الأبلة كانت ماسكة العصاية مش اللي كان بيقولها يا حاجة، ده لو ابن اللي بيصوره كان هيخليه ينام وكان هياخده ويروح ولو الأستاذة دي هي اللي عاوزه تنام كانت هتروح، بعد إذنكم بلاش تريقة، وبلاش حد يشارك الفيديو اعتبره زي ابنك، وإحنا هناخد حقه طبعا وبالقانون».
وأردف: «ابن صديقي، محمد مش سرسجي، محمد متربي، مشكلته أنه كان عاوز ينام بس من كتر التعب».
