إسماعيل ياسين في الفضائيات: إحنا بتوع فضايح مش بتوع إعلام

ياااااااصلاة النبى أحسن.. الحقنى يا حمدى يا كُنيسى.. أنا ياخويا مش عارف قنواتنا الفضائية دى مهمتها إيه بالضبط.. دماغى هتدشدش من التفكير.. نفسى أعرف واستعرف الناس دى شغلتها في الإعلام إيه.. هو الإعلام من وجهة نظرهم بيتلخص في برامج الطبيخ ولا إيه.. يا حلاوة المولد وفوانيس رمضان.. طب يكونش الرغى اليومى اللى بيسموه توك شو ده هو الإعلام؟!.. يا خى جاتك ستين “توك شو” على دماغك منك لُه لُه لها..

فضحتونا وسط الإعلاميين العرب يا أيها الموكوسين والموكوسات.. بقى أي مصيبة بتحصل خارج مصر أروح أدور عليها في القنوات الفضائية العربية؟!.. يا خى جاتك عربية أما تلهفك يا إعلامي نص لبة..

بقى سوريا بتنضرب بالصواريخ وأنتم بتحكوا في هزيمة الزمالك؟!.. يا أخى أوكا منك له لها.. إحنا بس فالحين نقول إننا رواد الإعلام في الوطن العربى؟!.. طب إدينى أمارة ياعم أبو العربى يا مزهقنى في عيشتى ومسّود عليا حياتى.. ده أنت مش إعلام أبدا.. أنت حاجة تانى.. أنت ميكروب.. أنت وباء.. أنت تستاهل الرش بالفنيك يا أيها «الموكوسيك»..

أيوه أنا اعترف إن مصر كان فيها كوادر إعلامية.. وكمان يا أبو عقل خفيف ودم سخيف منك له كوادرنا دى هي اللى عملت قنوات “سكاى نيوز والعربية والجزيرة والحرة” اللى إحنا بنجرى عليها مع كل حدث عاجل.. لكن للأسف مارجعوش تانى.. والدليل إن كل إعلامي من اللى بيشحتفونا يوميا بيقول إنه مالوش أساتذة.. يبقى فيه إيه بقى.. طالع شيطانى حضرتك؟!

الحقنى ياعم “مكرم” يا ساكن الهيئة الوطنية.. ده إحنا بقينا بتوع فضايح مش بتوع إعلام.. ده أنا لما بشوفهم بلاقى العفاريت بتلعب على بُقى النطة.. أعوذ بالله.. واحد بيشتم والتانى بيرد عليه ثم نلتقى بعد الفاصل وهاتك يا إعلانات.. أين المجالس الوطنية للإعلام اللى ربنا أكرمنا بيها.. هل كل مهمتها البحث عن أخطاء هؤلاء الإعلاميين، علشان توقع عليهم غرامات مالية؟!