لوسي: بسبب "المداح" اتأذيت من هند بنت الأحمر ملكة الجن (فيديو)
كشفت الفنانة لوسي، كواليس مثيرة ومرعبة من تصوير مسلسل المداح أسطورة العشق، وتعرضها للأذى من شخصية هند بنت الأحمر ملكة الجن، قائلة:"روحنا نصور في الفيوم عملت ميك اَب وكل حاجة وقلت هلبس لبس الجنية في فيلا صابر علشان المسافة من الفيلا للفندق بعيدة ومبقاش لابسة اللبس ده والدنيا حر جدا قبل ما اخش علي اللوكيشن في الفيلا بـ4 دقايق لقيت المخرج المنفذ هشام فتحي بيقولي انت فين ارجعي للأوتيل فيه عاصفة فظيعة والشجر بيخبط في بعضه، فقلت له مفيش حاجة على الطريق اللي جاي فيه، فقلت له أنا داخلة على الفيلا".
مشهد غريب من تصوير مسلسل المداح
وتابعت خلال الجزء الثاني من لقائها ببرنامج "العرافة" المذاع علي قناة "النهار":"وانا داخلة مكان التصوير وفيه شجر ومفيش عاصفة ولا حاجة دخلت رسيبشن الفيلا في الفيوم لقيت الرموش الطويلة اللى مركباها بتتهز جامد من الهواء، وهما مقفلين فتحت لقيت الهواء بينطرني، فقلت بركاتك يا ست هند الأحمر ملكة الجن وقلت لهم سلام عليكوا ومصورتش".
شخصية لوسي في المداح
وأضافت لوسي:"الشخصية اللى انا بلعبها في مسلسل المداح عاملة شغل معايا، الجنية هند بنت الأحمر ملكة الجن عاملة شغل معايا، وانا قرأت حاجات وعملت حاجات علشان اعمل الشخصية".
اذى ملكة الجن هند بنت الأحمر
وأكدت:"هند بنت الأحمر موجودة تحت الأرض وبتلازمني لحد دلوقتي، وكل شوية بتطيرني، علشان كده لازم اقرأ قراَن، وكنت أقول المشهد من هنا واقرأ قراَن من هنا، باحلف بالله اني اتأذيت من هند بنت الأحمر ملكة الجن".
الجنية الشريرة
وأكملت:"فيه جن طيب او جنية طيبة ومؤمنة ومسالمة وفيه جنية شريرة، وعلشان انا اعمل دور المداح كان لازم اعرف شكلهم وفيه كتب قرأتها وفيه حاجات وطقوس ليهم بس هما بيروحوا فين؟ الجن الطيب بيساعد الناس الطيبة والخيرة بأمر الله، وذاكرت الجنية هند بنت الأحمر وعرفت ان الشريرات منهم ضعفاء جدا بيروحوا للشخصية اللى نفسها وحشة وشريرة ويبتدي يشتغل عليها".
تعرض لوسي لأذي من الجن
وأشارت:"بعد لما عملت شخصية هند بنت الأحمر ملكة الجن حصلي حاجات غريبة واحس ان حد بيلمسني بس علاشن بقرأ قراَن كتير وأوضتي مفتوحة علي اذاعة القراَن الكريم 24 ساعة وبصلي فالحاجات دي كلها بتخليهم محلك سر بس بيلاعبوني شوية ويبعتولي حد يخضني والخضة ده حلو بيخفف علشان كده الأمريكان بيعملوا افلام رعب علشان الناس تخف".
مسلسل "المداح" الجزء الثالث من بطولة حمادة هلال وهبة مجدي ويسرا اللوزي ومحمد عز وعصام السقا ودنيا عبد العزيز وحنان سليمان وهلا السعيد وعفاف رشاد وخالد سرحان ومحمود عامر وبسمة ماهر وتامر شلتوت وسلمى أبو ضيف ورانيا فريد شوقي ومحمد مهران ولوسي وعبد العزيز مخيون وأحمد ماهر وصبحي خليل وأحمد كشك، إنتاج شركة سكرمو ميديا- إسلام المرسي، من تأليف وليد أبو المجد وأمين جمال وشريف يسري ومن إخراج أحمد سمير فرج.
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
