قصيدة "هو راح الجامعة ليه" للمعلم هريدي!

نفسى حد يقوللى مرة.. هو راح الجامعة ليه؟
لاجل يتعلم؟ برافو.. كلنا نحافظ عليه
ولّا راح الجامعة يهتف.. أو يرازى معلميه
أو في وش الناس بيصرخ.. إنتو عايزين منى إيه؟
إحنا إحنا.. وإنتو إنتو.. واللى فيه سنظل فيه
مستحيل حترجعونى.. عن طريق إخوان حاميه
قلت له ما تقلش حاقتل.. من يعارض وتعاديه
يابنى عبر عن إرادتك.. بس حق أخوك راعيه
جامعتك للعلم وانت.. للوطن حامى وبانيه
واللى عاش بين حبايبه.. رأيه عمره ما يداريه
اللى فاكر إنه فاجر.. ربنا راح يبتليه
مرة واحدة اسمع نصيحتى.. النجاح مش حتلاقيه
طول ما فكرك فيه تطرف.. واللى ضدك بتعاديه
مستحيل تصبح مواطن.. واللى ناوى عليه خافيه
انت طالب علم يابنى.. يعنى قدوة مش سفيه
اللى رافض حاوره وافهم.. وانت واثق بتحاكيه
واللى ضدك أو مخالف.. خد برأيه أو لاغيه
الحياة مش بالتعصب.. واللى غلطان اشتكيه
جامعتك مش لك لوحدك.. واللى ضدك بتساويه
والتفاهم شىء طبيعى.. بين زمايلك يا نبيه
مرة واحدة اسمع كلامى.. بالتفاهم احتويه
خدها يابنى نصيحة منى.. اللى باعك اشتريه
واللى مش عارف نهايته.. أوعى عمرك تبتديه