"جمهور بيصرخ" قصيدة للشاعر حسام درويش

كتب الشاعر الشاب حسام درويش قصيدة تحمل عنوان "جمهور بيصرخ" وفيها يقول:


كل كلامهم كان كالآتى
بحبك بسرح فيكى ليلاتى
وكاميرا تقرب تعمل زوُم
تكشف كادِر مِش معلوم
تِكشف إن بسبب الخوف
لِعبِت بيهُم ياما ظُروف
كاميرا تقرب كاميرا تشوف
فجأة الحلم أصبح مكتوم
فجأة البطلة تقوم مـ النوم
وبطلها واقف مهموم
بيقرب من نِن عنيها
بيدور على مين يداويها
بيدارى الدمعة المكبوتة
وبيُربط إيده فـ إديها
فجأة الصورة بدأت تغمق
وأنا واقف مهزوز فـِ عنيها
قلبها فجأة بطل دق
وأنا واقف عمال أناديها
فجأة عياط جمهور بيِصّرَخ
وكإن الموقف دا حقيقة
أصل البطَلة ماتت فعلا
جمهورها كان بيعزيها
بيعزيها فروحها الساكنة
الموجودة فقلب حبيبها
وبكدا خلص الفصل الأول
وستارة بتقفل عـ المسرح
ونِهاية قِصة حَبِّيب
فـِ حبيبته كان ديما يسرح
ووداع مربوط بنَصيب
ونَصيب كان قاسى شوية
وحَبيب قرر ما يغيب
مع إن حبيبته مهِيش جايه!