هاشتاج «#باسم_رئيسًا_لمصر » الأول على «تويتر».. «يوسف»: فيلا ويخت لكل مواطن.. نشطاء: «هننتخب رئيس يفرحنا أحسن من واحد تاني يقرطسنا».. «أول مرشح هيمشى على س

احتل هاشتاج «#باسم_رئيسا_لمصر» على «تويتر» المركز الأول في التغريد على مستوى مصر بعد ساعات من إعلان باسم يوسف، في برنامجه، مساء الجمعة، في إطار تحدثه عن مرشحي رئاسة الجمهورية.

وتفاعل النشطاء على «تويتر» مع الهاشتاج، مرحبين بالفكرة التي أطلقها «يوسف»، الذي علق على قوة التفاعل معه، قائلًا: «تريندج عالميا في أقل من ١٥ دقيقة:) فيلا ويخت لكل مواطن».

ورفض «ميمو» توليه المنصب قائلا: «وماله بس مينفعش يا باسم، لأن مفيش فرق بينك وبين مرتضى.. هو بتاع سديهات، وأنت أراجوز، ومصر أكبر من كدة بصراحة»، فيما قال «نعمان»: «لما نحب نحضر خطاب رئاسي ليك هاتعملنا مسابقة عاليوتيوب عشان ناخد tickets؟».

وأشار «سعيد»، إلى أن «باسم هيبقى أول مرشح رئاسى يمشى على سكربت مش برنامج رئاسى، وطبعا هيبقى رمز الأراجوز برضو لأول مرة، وبرضو مننساش، لازم باسم يعين خالد منصور رئيسًا للحكومة، وشادي وزير للإعلام، وأيمن يمسك باقي الوزارات بالعافية».

وكتب «صلاح»: «باسم يوسف يا بلاش واحد غيره مينفعناش.. بالروح بالدم نفديك يا باسم». وقالت «إيمان»: «ياسلام بقى لو بقى باسم الرئيس ومرتضى رئيس الوزراء ده الشعب هيهيص هيبقوا أحلى من توم وجيري».

وأوضاف «عادل»: «أهو ننتخب ريس يفرحنا ويضحكنا بدل ماننتخب ريس يقرطسنا»، وكتبت «ميادة»: «برنامجه ومعروف وفريق عمله حاجة تشرف والله.. صوتى لباسيييييييم».

وقال «تيتو»: «عشان يبقى أول ﺭﺋﻴس يخلص شغله الصبح في الرئاسة، ويطلع يسخر من نفسه بالليل».