بلاغ من مواطن لـ«الوزير» الموقر

إليكم بلاغ من مواطن شريف
يا دوبك بلاقى الغموس والرغيف
بقول ف البلاغ بأن المواطن
نهاره وليله ده ف الهم ساكن
ساعات العيال بتتعشى لكن
سعات ياكلو همه وأنا أنام خفيف

تعرف سعاتك
دا لو جالى ضيف
أقول أجيب شاى ولا ساقع
وامشيها شاى يادوبك خفيف

أنا يا معالى الوزير الموقر
موظف حكومة ودخلي ضعيف
وساعة ماييجي المرتب بفكر
ادفع إيجار أجيب غاز انور
واجيب مرة لحمة
واجيب مرة فرخة
واجيب شاى وسكر
وافضل أحاول وأحسب وأدور
ألاقى اللى باقى بعد السداد
يكفى يومين أقول يا لطيف

وتيجى المدارس
والاقى العيال
ده بيقول هاتلى شنطه
وده يقول هاتلى جزمه
وأم العيال
دى عايزالها طرحه
أنا زهقت منهم وحاسس
يا ها ا سرق
يا هاشحت
يا هاتجيلى ذبحه

قالوا عملنا ثوره
مشيت ف المظاهره
ومشينا دولا
ومسكونا دولا
وجت تانى ثورة
مشيت ف المظاهره
ومشينا دكهم
ومسكونا دولا
وانا في عهد دول
ودكهم ودولا
مواطن شريف
يدوبك بلاقى الغموس والرغيف