بالصور.. شابان يتعاطيان المخدرات أمام المارة في حدائق القبة

أمام الحديقة اللطيفة تطل شرفة حجرتي التي أصبحت أتحاشى فتحها كي لا أرى الحديقة التي صارت لعنة على سكان المنطقة وأنا منهم. ذلك الحي؛ حي الطبقة المتوسطة الذي استكثره علينا المدمنون.. ممن يهددون أمننا في صمت وتراخٍ حيث إننا طالبنا من المسؤلين بقسم حدائق القبة دورية أو حتى مخبرين سريين يتناوبون لرصد ما يحدث من مهازل، ولا حياة لمن ننادي.

ها هي تجربتي الخاصة جدا بين أيديكم والصور مرفقة من تصويري الخاص واعذروا عدم جودتها حرصا على أمني وبين أيديكم تجربتي في وضح النهار. 

(صوت اتنين شباب بيتكلموا كلام ما فسرتوش.. نومي خفيف فَقُمت بصيت لقيت شابين مظهرهما كويس بيضبطوا (بودرة) على كبوت العربية المركونة.. مش حقن المرة دي، كنت إيجابي وفتحت البلكونة وقلتلهم من فضلكوا امشوا من هنا، ارتبك الأول وحط كفه على الهيروين وقال لي: حد ضايق حضرتك في حاجة؟ قلت له: خد اللي أنت مداريه بإيدك وامشي لو سمحت. ودخلت وقفلت البلكونة وأنا من جوايا بارتعش. واحد فضل يقول للتاني: يللا ياعم من هنا. والتاني شتم عليا بصوت واطي وفضل واقف لحد ما خلصوا وأنا قاعدة وما زلت باعيط. ومش عارفة أنام مش قادرة أوصف إحساسي. بس أنا بكره البيت ده وبكره اللي بيحصل وبكره كل القرف ده ويائسة، أنا حاسة بغثيان. مع العلم المكان ده مش عشوائية. مش حي فقير.. ده حي ثلاثة أرباعه محلات، البرندات موجودة فيه بالإضافة لسلاسل المطاعم المعروفة متوسط سعر الشقة اللي فيه أقل من 100 متر هنا 300 ألف وانت طالع، المعلومات عن الحي دي من باب أننا اعتدنا أن الحماية بتكون وفقا للـ life style إنما حتى في دي.. احنا متسابين) 

إمضاء: مواطنه مصرية يائسة.