بالفيديو.."فاطمة" أمام محكمة الأسرة:"أنا ضحية الزواج المبكر".."أهلي رمونى لواحد أنا أرجل منه".."جوزى دخل السجن خلعته واتجوزت شقيقه".."اشتغلت في مقلب زبالة علشان أعيش أنا وعيالى"

الحزن تملك من فاطمة والدموع ملأت عينيها "كنت بموت كل يوم، أغلب الوقت غضبانة عند أهلي، ياريته اكتفى بقعدة البيت وسكت لا ده بقى يشرب مخدرات مفيش نوع مجربهوش حتى الهيروين بقى يشمه، بعدها دخل السجن في قضية مخدرات واتحكم عليه بـ10 سنين، بقيت لوحدى أنا وعيالى، اشتغلت اكتر لكن الناس مسبتنيش في حالى.



وأضافت "الفترة اللى جوزى دخل فيها السجن أخوه كان بيزورنا يطمن على العيال، لكن ده مكنش مريح مراته، فاتهمتنى أنى على علاقة بجوزها، ودخلت في دماغ جوزى كده، لدرجة أنها بقيت تبعت له صورى، وهو في السجن وتقوله أنا لاقيتها في محفظة جوزى، ولما كنت بروح أزوره في السجن كان بيطردنى ويقولى مش عايز أشوف وشك أنت خاينة، اتخنقت منه ومن تصرفاته فرفعت قضية خلع قبل ما يطلع بسنة واتحكملى قبل خروجه من السجن بيوم، خفت أقوله طبعا، و رفضت أنه يلمسنى وفضلت على الوضع ده فترة، لحد ما عرفت أنه اتجوز عليا واحدة تانية كانت متجوزة قبله أربع مرات فقلته إنى خلعته، وبعدها بفترة اتقدملى أخوه وافقت عندًا فيه وعلشان الناس كلها تعرف إنى شريفة، وبصراحة أنا وافقت بدل مانحرف، ولما عرف ضربنى وضرب أخوه وكان عايزنى أطلق منه".

فاطمة تقول "كنت فاكرة أنى هرتاح لما اتجوزت أخوه بس أنا هربت من جحيم لجحيم، كنت فاكره أنه هيكون حنين عليا، لكنه بقى يضربنى بالكرباج والنبوت على أتفه سبب، ودايما يقول لى كل الستات خاينة مالهمش أمان".

فاطمة تكمل قصتها "ياريت الموضوع انتهى عند الضرب والإهانة بس، ده كان بيسمعنى صوت عشيقاته في التليفون ويصورهم ويورينى صورهم، كان بيصطادهم من الكباريهات، بعدها اطلقت منه".

فاطمة تنهار " ابنى مات بسببه كان عنده 8 شهور، وابنى محمد الكبير ضاع منى جاتله عقدة نفسية من جوازى بعمه ومش بشوفه تقريبا، أنا تعبت وشقيت على ولادى علشان أحافظ عليهم، خصوصا البنات مكنتش عايزاهم يتبهدلوا ابدا".
فاطمة اختتمت قصتها "كل اللى عايزه أقوله لجوزى وأخوه منكم لله وحسبى الله ونعم الوكيل فيكم".