ساخرون.. مذكرات سوزان على mbc مصر مقابل 200 ألف دولار للحلقة!
علمت وكالة أنباء "هريدي نيوز" أن قناة "إم بي سي مصر" تسعى إلى اتفاق مع سوزان مرات الرئيس السابق مبارك علشان تذيع مذكراتها في شكل حواري على 10 حلقات على مدى شهرين ونصف الشهر.
وقال مصدر غاوي فشر كان موجودا أثناء زيارة مندوب المحطة لمنزل الست أم علاء إن الأجر عن كل حلقة هيكون 200 ألف دولار وبكده تكون مذكراتها هتتكلف على القناة 2 مليون دولار.. بنت المحظوظة.
وأضاف المصدر أنها موافقة على المبدأ والخلاف على شكل وصياغة الأسئلة وتوقيت العرض وكمان لازم تشوف الحلقة قبل العرض واللي مش هايعجبها مش هايتذاع.
وأكد ذات نفس المصدر الفشار: أن مرات مبارك طرحت عليهم تخصيص حلقة عن ملف التوريث.
وبالطبع جوزها وأولادها أكيد محظوظين علشان الست عايزة تروج في القناه دي إنهم مظلومين قوم إيه الناس تتعاطف معاهم..
سيبك أنت المحظوظ محظوظ ومبارك من المحظوظين.. ومرسي اللي مش لاقي محامي دا طبعا منحوس منحوس ولو علقوا على رأسه فانوس!
