بالفيديو.."منى" تصرخ "ارحموني من هارون الرشيد".."اتجوز عليا 13 مرة.. سابني متعلقة 17 سنة".."عايزة أثبت إني اطلقت 3 مرات ومش عارفة".."نفسي في معاش علشان اعرف أعيش بالحلال
كان يبحث عن امرأة تنجب له "ولد" يرث ماله، وهى كانت تبحث عن رجل ينتشلها من الفقر الذي تعيش فيه، ففي الفقر تكمن معاناة منى.
"منى -ع" في العقد الخامس من عمرها، حضرت لمحكمة الأسرة بمصر الجديدة لرفع دعوى خلع ضد زوجها السوداني الجنسية بسبب فشل كل محاولاتها في إثبات طلاقها الثالث منه، بعد أن استولى على قسيمة الطلاق ورفض تسليمها لها وتركها "معلقة "لمدة 17 عاما.
منى فتحت قلبها لـ"فيتو" قائلة "أنا بقالي 17 سنة مطلقة أو متعلقة مش فارقة كله واحد علشان كده انا جيت أرفع دعوى خلع عايزة أي ورقة ثبت إني مبقتش على ذمة الراجل أبو عين فارغة ده، واقدر أقدم على معاش آكل واشرب منه وأعيش، ماأنا هعيش منين الواحد يعيش بالحلال أحسن مايعيش بالحرام وبعدين انا والدتى سيدة مسنة وعندها السكر ومش بتشوف ووالدي متوفي وحالتنا صعب ".
تابعت والدموع في عينيها " : مشكلة زوجي أنه مزواج، كل شوية يتزوج واحدة شكل اتجوز عليا 13 مرة، وفى كل مرة كان بيطلقني بينه وبين نفسه مش عند مأذون، ويرجع يقول لي انا رديتك تاني لعصمتي، انا حتى معرفش هو طلقني كم مرة، لكن اللي انا متأكدة منه أنه طلقني 3مرات ".
تتذكر منى تفاصيل لقائها بزوجها:" مكنتش اعرفه، اتجوزنا زواج تقليدي، هو تاجر سوداني ثري، وأنا من أسرة فقيرة، كان عايز زوجة تخلف له الولد يحمل اسمه ويرث ماله، شافني وأعجب بي وتقدم لخطبتي، قبلت به رغم فارق السن الكبير بيني وبينه، كنت على علم أنه متزوج بأخرى، لكني لم أكن أعلم أنني الزوجة السابعة، عرفت هذه الحقيقة بعد أن سافرت معاه السعودية، واتصدمت أن فيه 3 زوجات على ذمته ومطلق قبلهم ثلاثة وأنا السابعة.
منى تتابع حكايتها "بس هعمل إيه؟ يعني خلاص جت الطوبة في المعطوبة واتجوزنا ولو قلت عايزة أطلق هيرميني زي الكلبة قررت أن أستحمل، وأنجبت منه سبعة أطفال بنتين و5 ولاد، بس الحقيقة هو كان بيعدل بينا، ومكنش بيسمح لواحدة مننا أنها تتعدى على ضرتها،عشت مع زوجاته الثلاث وأطفاله في بيت واحد كلنا زي الأخوات لمدة 16 سنة وانتقلت معه للسودان واستقرينا هناك لحد ماطلقني الطلقة الثالثة علشان يتزوج، فاستنجدت بأخيه وابنتي ووفروا لى نفقات السفر للقاهرة، رجعت لبيت أهلي، ودلوقتي أنا عايشة على مساعدات أهل الخير ".
اختتمت الأم المكلومة حديثها مع "فيتو" قائلة:"أنا كل اللي بتمناه إن المحكمة تساعدني إنى آخذ قسيمة الطلاق علشان أقدم على معاش،وتخليني أشوف أولادي الأربعة اللي واخدهم مني ومقعدهم معاه في السودان، بحجة أنهم لم يكملوا السن القانونية ديه أهم حاجة ".
