ننشر رسائل عماد شنودة المتضرر من السيارة "رينو"

نشر عماد شنودة المدير المسئول بمؤسسة الصوت الحر، على صفحة التواصل الاجتماعي الخاصة به، قصته مع سيارته رينو Renault، قائلًا: "تسببت في حرق قدمي حروق من الدرجة الأولى وتقريبًا كنت هاموت أنا وعيالي ومراتي (لولا حماية الله لنا)".

وأضاف: "نشرت نص الرسائل التي أرسلتها للشركة على صفحتها الخاصة على الفيس بوك، والتي انتهت بأن شكواها في يد الشئون القانونية".

واستطرد شنودة في سرد تفاصيل واقعته مع السيارة، قائلًا: "واحد من أصدقائي المدئرمين اللي كل حياتهم عربيات، قاللي معلش يا برنس هي جات فيك، هي كل العربيات الرينو بتعمل كده. اتاري السر في أن الشركة العبقرية اللي بتصنع الرينو عامله السربنتينا (المشع) بتاع التكييف السخن جوه صالون العربية وبالظبط جنب دواسة البنزين لزوم التدفئة بالشتاء!!! المهم ان ده حصل ودون أي مقدمات وأنا مواظب على الصيانة. وحتى ولو مش مواظب على الصيانة الجزء ده من العربية مش موجود كجزء من الأجزاء اللي لازم تتغير أثناء الصيانة الدورية. طبعًا أنا ورجلي بالحروق اللي شفتوها مقدرتش أتحرك من البيت لعدة أيام. قلت لنفسي أنا مش هاسكت لأن ده عيب تصنيع (أو عيب تصميم) رهيب ممكن يتسبب في قتل أي حد".

وتابع: "دخلت على موقع شركة رينو الدولي وكتبت شكوى. بعدها بأربعة أو خمسة أيام اتصلوا بي بتوع شركة رينو هنا في مصر (#المصرية #العالمية #للسيارات #EIM) وطلبوا رقم الشاسيه بتاع العربية، قلت في نفسي دا باين عليها شركة محترمة وشكلها هتعمل حاجة. اديتلهم الرقم وبعدها بيومين اتصل بي مدير الصيانة بالشركة (مهندس يحيى خليفة)، المهم المهندس يحيى سألني إيه اللي حصل؟ حكتله. اوم ايه يقولي وايه يعني اللي حصل؟؟ ما هي ديه مشكلة معروفة في العربيات الرينو وبتحصل كتير؟؟؟ قلتله بس دا ممكن يتسبب في موت ناس؟؟ قالي لا مش بيحصل لأن الناس بتلغي التكييف السخن في العربية ويا دار ما دخلك شر؟؟ بالسهولة ديه؟! وقالي احنا ممكن نصلحها لك ونعمل خصم بس أنا منصحكش تعمل كده لأن الموضوع دا ممكن يحصل تاني؟؟ يا نهار أسود ومطين بطين؟ الراجل بيعترف أن الموضوع معروف وبيحصل وهما مش فارق معاهم؟؟ قلت له دا كلام خطير وغير مقبول وأنا هاصعد الأمر، قالي براحتك.