حورية فرغلي: أديت الحج 7 مرات ولا أستطيع الإنجاب بسبب مشكلة في الرحم (فيديو)
حورية فرغلي، قالت الفنانة حورية فرغلي: “تعرفت على مساعدة المخرج الراجل يوسف شاهين وصممت إنها توصلني له، وبالفعل رُحت، وهو كان وقتها بيمنتجوا فيلم ”هي فوضى" مع خالد يوسف، وقتها قال لي: "انتي رقيقة والكاميرا بتحبك".
رأي يوسف شاهين في حورية فرغلي
وأضافت خلال لقائها ببرنامج "صبايا الشمس" الذي تقدمه الإعلامية ريهام سعيد بقناة "الشمس": “يوسف شاهين قال لي إنتي بتعرفي تمثلي، قلت له بصراحة مبعرفش، قال لي خليكي احضري معايا ورش، وأنا تحمست ليكي، قلت له ممكن تقول لي على مكان آخد فيه دورات وورش تمثيل علشان محدش يقول عليا إني واسطة، وعلشان ملكة جمال مصر دخلت التمثيل، ولكن بتمثل علشان هي موهوبة وشاطرة، فعرفني بواحدة اسمها مروة جبريل، وقال لي تروحي تاخدي معاها ورشة، قلت له: يا إما ابقى “نمبر وان”، يا إما مش هقبل أمثل، وللأسف بعدها توفي، بعدها كلمني خالد يوسف، واشتركت في فيلم ”كلمني شكرا"، وأنا فعلا بعرف ارقص وبحب الرقص".
حادث حورية فرغلي
وأشارت: "بعد حادث سقوطي من علي الحصان عملت 27 عملية في مناخيري وفي الآخر مكنتش بعرف اتنفس، ومش عارفة اتذوق الأكل ولا أي حاجة وشكلي مكنش حلو، ومكنتش بحب أبص في المراية، وكنت بحط فويل على المرايات، وأنا مشكلتي لما أوصل للقمة في أي حاجة بتحصل لي مشكلة بتخليني أروح لمكان تاني".
أداء حورية فرغلي الحج
وتابعت: "أديت الحج 7 مرات وعلى طول محسودة وأي حد يقول لي أي حاجة لازم مصيبة تحصلي، ودايما بقول يارب احميني، وعمري ما دعيت إني يارب عايزة اتجوز أو أخلف، دعائي على طول إني ربنا يحفظني ويحميني، وانا راضية بحالي".
مشكلة حورية فرغلي مع الانجاب
وأشارت حورية فرغلي: "لما اتجوزت 3 شهور، اكتشفت إني مبخلفش ومليش في الإنجاب، ومش ده كان سبب طلاقي ولكن مكناش سعداء مع بعض، وكذا طبيب أكدوا لي إني مليش في الخلفة، ودي حاجة مولودة بيها وعملت اختبار في إنجلترا قالوا لي الرحم نفسه مش طبيعي، وأنا الحمد لله راضية".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا، دوري أبطال أفريقيا، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
