عمرو أديب: الزمالك بقى خرابة ومنتظرين إيه من نادي رئيسه خارج من السجن (فيديو)
علق الإعلامي عمرو أديب، على خسارة نادي الزمالك من نادي البنك الأهلي وخروجه من بطولة كأس الرابطة، بثلاثية نظيفة.
هزائم نادي الزمالك
وقال عمرو أديب خلال برنامج "الحكاية" المذاع على قناة "إم بي سي مصر 2":"الزمالك اتغلب من البنك الأهلي 3/0 في عام 2023 الزمالك لعب 17 ماتش اتغلب في 10 رقم قياسي عالمي جديد، احنا ما بنتكلمش على فرقة احنا بنتكلم على خرابة واللي مش مصدقني يبص على الجول الثاني للبنك الأهلي".
أهداف البنك الأهلي في الزمالك
وأضاف: "لما اتفرجت على أجوال البنك الأهلي في الزمالك يوريك حالة فرقة نادي الزمالك الخرابة، والكرة في الهدف الثاني وكأنها اترمت في خرابة، اترمت وراء دفاع الزمالك اللى خرابة واللي مفيهوش حد واللي ما حدش واقف ولا حد قادر يجري ولا يعمل أي حاجة فلاعب البنك الأهلي خد الكورة ومفيش معاه ولا لاعب من نادي الزمالك وكلهم وقفوا يتفرجوا عليه وقالوا ياااه احنا لسه هنجري يا عم وراك ما تروح أنت تجيبها أو ما تجيبهاش، فاكتشفوا أن لاعب البنك الأهلي لعب الكورة وجاب جون".
انهيار نادي الزمالك
ولفت: "الزمالك دخل فيه 3 أجوال في 7 دقايق رقم قياسي عالمي جديد، الموضوع مش غريب هي لعيبة الزمالك أنت طالب منها إيه مفيش مدرب وكل يوم ينزلوا التدريب يلقوا حد جديد النهارده الخواجة والنهاردة الخواجة مشي والنهاردة أسامة نبيه والنهاردة عبد المقصود والنهاردة عبد المعبود والنهاردة هنجيب واحد اجنبي والنهاردة هنجيب حد من ابناء الزمالك، مفيش مدرب، النادي الثاني الأكثر شعبية في مصر والعالم العربي نادي الزمالك المصري نادي البطولات معندهوش مدرب واللعيبة ما بتقبضش ورئيس النادي كان في السجن".
وتابع: "أنت متوقع إيه من اللعيب ده، هما خلاص عرفوا إن مفيش أفريقيا ولا دوري ولا فيه رابطة ولا فيه أي حكاية هينزل يلعب ليه الغرض انتهى، معقولة يا جماعة دا يتعمل في الزمالك، هل من الممكن يبقى فيه نادي حياته عامله كده وبيتعمل ليه فينا كده؟ ليه الزمالك بيتعمل فيه كدا وليه بنتهان وكل الفرق بتتغلب ولكن مش بالإهانة دي، ده فيه عيل صغير نزل كان هيجيب الرابع في عواد"
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم، أسعار الدولار، أسعار اليورو،أسعار العملات، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطال، الدوري المصري، دوري أبطال أوروبا،دوري أبطال أفريقيا ، دوري أبطال آسيا ، والأحداث الهامة والسياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
