شاهدة عيان تروي تفاصيل سقوط سيارة ملاكي في حفرة صرف بالمعادي (صور)
روت شاهدة عيان، تفاصيل سقوط سيارة ملاكي داخل حفرة صرف صحي بمنطقة المعادي أمس الأربعاء.
وسردت الصحفية ولاء الشنواني، تفاصيل الحادث لـ"فيتو" قائلة: "إمبارح في الزهراء وأنا مع زوجى وأولادى في الشارع المظلم اللى بتدخل منه على مسجد العظيم من ناحية كارفور مش من شارع الخمسين الطريق المظلم اللى منه بتطلع علشان تاخد اتجاه كارفور مش قادرة أوصفه، المهم وأنا طالعة أنا وزوجى اتخيلت بعربية بدل ماتدخل الشارع نزلت في غرفة الصرف الصحى اللى مش مقفوله ومظلمه وعميقه نحو تقريبا 7 متر لتحت".
وتابعت الشاهدة روايتها: "قولتلو أنا اتخيلت بحاجة هناك وقعت وقفنا، وجدت واحدة وطفلة صغيرة بعربية بيجو ملاكى واقعين.. الناس وقفت وسألونا في إيه نزلوا وابتدوا كلهم يساعدوهم واتصلوا بالنجدة والست في حالة انهيار.. زوجى خد حبل من العربية وبعته ليها ونزل واحد ربطها هي والطفلة وطلعوا.. طبعا كان ممكن جدا محدش يحس بيها تماما لولا ستر ربنا وإنى لمحت خيال العربية".
وختمت الشنواني رسالتها لـ"فيتو": "بجد حرام إحنا مالناش أي تمن ولا يمكن نحس بأى أمان ولا شىء ممهد للحياة الإنسانية.. خلو بالكم اوى من الشوارع اللى حوالين مسجد العظيم من عند كارفور غير آمنة بالمرة".
كانت منطقة زهراء المعادى، شهدت مساء أمس الأربعاء، كثافات مرورية، بسبب سقوط سيارة ملاكى داخل حفرة صرف صحي.
وتلقت غرفة عمليات النجدة، بلاغا من الأهالي، بسقوط سيارة بحفرة صرف صحي وعلى الفور انتقلت الأجهزة الأمنية وتبين أنه أثناء مرور سيارة ملاكى سوداء اللون اختلت عجلة القيادة بيد سائقها وسقطت داخل الحفرة وتمكن الأهالي من إنقاذ ركابها وتم رفع السيارة.
