إسماعيل ياسين في المدارس التجريبية: «هش هش يا ديك المدرسة دي مش ليك»
إلحقنى يا my dear.. آه والنبى يا عزيزي إلحقنى.. الحكومة هتحرمنا من اللغة الإنجليزية في المدارس التجريبية.. قال رضينا بالإنجليزى والإنجليزى مارضيش بينا.. ياااااادهوتى يانى يابا يالالالى.
طب يكونش استكتروا علينا نعلم أولادنا إنجليزى زى أولاد الذوات؟!.. آه والنبى كدا الكلام يبقى معقول.. مع إنى مش قد القول.. ما هو الفول من الطعمية والطعمية من الفول.. وتروح فين يا عصفور وسط النسور!!
يوه.. ما هو صحيح برضوا احنا زودناها حبتين.. آه والنبى.. إننى اعترف بهذا الذي أقول.. دى الولية مراتى بتقعد مع الستات الهاى وتفضل ترغى بقا.. الواد ما أخدتش الساينز.. الإكزمينيشن هتبتدى والواد ماعملش الإكسرسايز بتاع أم اللى جابت أبوه.. وبتتكلم عن ابنها اللى بيدرس في التجريبية وكأنه في مدرسة الفيرير.
آه والنبى تلاقى الناس اللى أولادهم في مدارس لغات دولية قرفوا منى ومن مراتى فراحوا اشتكوا لمعالى الوزير وقالولوه “إزاى الناس البيئة دى تربط حمارها جمب حمار العمدة”.
وعلى هذا الأساس قوم إيه الوزير لغى التعليم بالإنجليزى في المدارس التجريبية علشان الهلافيت اللى زينا يلزموا حدودهم ويرجعوا لأصلهم.
والنبى يا وزيرنا معاك ألف حق.. دا أنا نفسى قرفت من مراتى وطريقتها في الكلام عن ابنها.. خليها بقا ترجع لأصلها وتقول الواد ما حلش الواجب و”الأبله” نعيمه هتضربه.. وترحمنا بقى من المس والمستر اللى مغلبينها.
عموما احنا “متشنكرين” قوى.. ورغم إنى حاسس إن أنفُخى هتدحرج من أدمُغى اللى هتدشدش على سبعين ألف حته بسب هذا القرار الغريب، إلا أننى عارف إنك أكيد انت صح.
والنبى ما تزعل مننا يا وزيرنا ولا تحبسنا.. دا احنا في الآخر ناس غلابه افتكرنا نفسنا ممكن نعلم أولادنا باللغات زى أولاد الذوات.. لكن خلاص حّرمنا نفكر كدا تانى.. ليك عليا هقول للواد حصاوى ابنى “ هش هش يا ديك.. المدرسة دى مش ليك” وهرجعه مدرسة البلاليص من تانى
يلا بقا السلامو عليكووووووووووووووو
