رئيس التحرير
عصام كامل
Advertisements
Advertisements
Advertisements

إسماعيل ياسين في وزارة البيئة: آه ياني يابا من ذاك التلوث

فيتو

إلحقيني يا وزارة البيئة والنبي.. بركاتك يا عم “خالد فهمي” يا ساكن الديوان.. ربنا يجعل كلامنا خفيف عليك.. قصدي على معاليك.. الزبالة بقت في كل مكان.. في كل شارع.. في كل حارة.. في كل باذنجان.


آه ياني يابا من ذاك التلوث.. إني أشم رائحة الفونتستاتا.. والنبي مانا عارف هي إيه الفونتستاتا ولا حتى البروستاتا
آه يا دهوتي ياني يابا.. أعوذ بالله من هذا الذي أراه.. أين أنتِ يا حقوق الإنسان.. إنني في منتهى «الإنعياى».. عيان من كيس الزبالة اللي الست حرمي بتمنعني انزل لشغلي إلا وهو في أيدي.. عيان من ريحة أكوام الزبالة على أرصفة الشوارع.. عيان من وعود المحافظين ورؤساء الأحياء بنقل الأكوام اللي بتزيد يوم بعد يوم.

وأخونا الدكتور خالد فهمي وزير البيئة عامل ودن من طين والتانية من زلابية.. وبيقولك أنا وزير بيئة مانيش رئيس رابطة الزبالين.. إنه يهتم بالملوثات اللي في الجو وليس التلوث اللى على الأرض.. ياخي جاتني صاروخ جو أرض ياخدني من هنا ويوديني العين السخنة عند سمك القرش يقرطمني.
 برضو هبقى ضحية البيئة المائية وساعتها الوزير هيقول مش من اختصاصي برضو.

إذا ما هو الحل.. إلحقني يا شاويش عطية وأنقذني من هذه الرزية.. طب أروح أرمى نفسى تحت مصنع من اللى بيصرفوا مخلفاتهم في النيل؟!.. لأ لأ.. أنا أركب طيارة ورق، وأطير في الجو وأموت من ريحة دخان مصانع الأسمنت وقصب السكر وبكدة أبقى ميت بسبب تلوث الجو علشان الوزير يهتم بيا.

هع هع.. الوزير بيقول إنه هيحل مشكلة الزبالة خلال الأربعة سنين الجايين.. وأنا ياخويا سمعت العبارة دى من عشرين وزير قبله.. ومعرفش ليه كلهم بيقولوا خلال أربع سنين.. يكونش عارفين إنهم بيمشوا بعد أربع سنين فبيريحوا أدمغتهم مننا؟!
وأدينا احنا بننسى والوزير بينسى والحكومة بتنسى.

ياخواتي حكومتنا نساية.. وحكايتي وياها حكاية.. ذاكرتها ضعيفة للغاية.. مش فاكرة إنها عايشة معايا
إنها حقا نساية.. وأخيرا.. سلامو عليكووووووووووووو
Advertisements
الجريدة الرسمية