فتاة تستغيث بنشطاء مواقع التواصل للبحث عن «توك توك» (فيديو)
استغاثت فتاة بنشطاء مواقع التواصل الاجتماعي "فيس بوك وتويتر"، وأعضاء الجروبات المختلفة؛ للبحث عن لصوص، قاموا بسرقة "توك توك" والدها المتوفى من أمام المنزل بشبرا، محافظة القاهرة، وفروا هاربين، واستغاثت الفتاة بالنشطاء للبحث عن السارقين؛ لتتمكن من استعادة مصدر رزق العائلة بعد وفاة والدها.
البداية كانت عندما وضعت الفتاة ياسمين تدوينة لها على أحد مجموعات فيس بوك، قائلة: "بابا مات منذ ٤٠ يوما، ودا تقريبا أكبر وجع، واللي مجربه عارفه، وبابا كان من نصيبه أن يموت غفلة، الموت اللي كنا دايما بنستغرب منه، وبيجنن أي عاقل".
وقالت ياسمين: "بابا ٤٧ سنة، قبل ما يموت بكام شهر كان بيشتغل، والشغل بتاعه باظ تمامًا، فقرر يجيب توك توك جديد بالقسط، بحيث يكون مصدر دخل للبيت، ويسدد قسطه لحد ما يشوف حاجة جنبه، بابا مات والسند والضهر وكل حاجة حميانا بمعنى الكلمة، راحت، وده أكبر وجع".
واستطردت ياسمين في سرد حكايتها قائلة: "بعد اليوم الـ١٥ من موت بابا، صحينا الصبح لقينا التوك توك اتسرق، ودي كانت تاني صدمة، ولما شوفنا كان في كاميرا أكدت الواقعة، مكنتش متخيلة إن فيه ناس بشعة كده، وتسرق مال يتامى".
"التوك توك لسه جديد، وعليه أقساط كمان، اتنين سرقوه، والتالت كان واقف في الفيديو التاني بيراقب لهم، سرقوه والنَّاس بتصلي الفجر في المسجد، عملنا محضر بس للأسف الحكومة بتقول لأخويا الصغير، دور إنت.. إحنا منعرفهمش". هكذا قالت ياسمين.
وأضافت: "أنا بس طالبة لو حد اتعرف عليهم ياريت يبلغني لو حد شاكك في أي حد يقوللي، شاكك في توك توك مسروق أو حتى يعرف مكان وأماكن ممكن نلاقيه فيها، وبأي طريقة ياريت تساعدوني.. المكان شبرا مصر القاهرة".
