إسماعيل ياسين في مستشفى المجانين: «ما لقيوش في الشعب عيب قالوله يا مجنون»
أنا ياخويا بقيت حاسس إن أنفُخي هتدحرج من أدمُغي.. آه يا شلاضيمي ياني يابا.. مش عارف الحكومة دي عايزة مننا إيه.. تقشُف واتقشفنا.. تمسكُن واتمسكنا.. تنيُل واتنيلنا.. عملنا اللالي وبرضه مش عاجب.. وعايزين تطلعونا شعب تراللي.. وقال على رأي المثل “مالقيوش في الشعب عيب قالوله يا مجنون”.. يوه.. ما إحنا لازم نتجنن من اللي بتعملوه فينا.
قال إيه ياخويا فيه إحصائية بتقول إن نص الشعب المصري مرضى نفسيين.. آه والنبي زي ما بقولك كده.. والنص التاني بيشاور عقله.. وهذا الكلام وفقا للمسح القومي اللي اتعمل من كام يوم كده
أما أختنا الجوهرة المصونة صاحبة الدراسة اللى أثبتت أننا شعب “فسفس” فبتقول: إن نحو رُبع المصريين بيعانوا من أمراض نفسية والرُبع التانى مرضى بالاكتئاب والقلق والهسهس.. ده غير اللى بياخدوا حشيش بقى وأفيون وبانجو وفودو وبرشام هلوسة.. يعنى تقريبا نص الشعب عنده ربع ضارب، والنص التاني بيهّيس.. واللي هيجنني إن الجهاز المركزي للإحصاء قال نفس الكلام.. ووزير الصحة عايز الشعب يتعالج من المناخوليا.. يااااااااااااحلولى
طب لما إحنا مجانين.. انتم بتحكمونا ليه؟!.. شلاضيمي بتسألني اشمعنى دلوقتي الحكومة بتعلن أن الشعب مجنون؟!.. أنا بقى هقولك يا شلاضيمي ليه ولماذا.. لأن الشعب زعلان من زيادة مرتبات الوزراء.. فقوم إيه واحد ذكى حبتين قال أنا هثبتلكم بالدراسة والبرهان إن الشعب ده مجنون وماحدش ياخد على كلامه.. وألف مبروك عليكم الزيادة بس ماتنسونيش والنبى.
طب هو مين بقى اللي جنن الشعب وجابلنا مناخوليا غير الحكومة وإعلام الحكومة اللى بياكل في أدمغتنا ليل ونهار؟!
والنبى يا حكومة بلاش موضوع الجنان ده، وشوفولنا أي مرض تانى.. ده الزمن كالح والفقر كابس والرزق حابس وإحنا بقينا شعب عليل مكسور وذليل.. أنا مش هنكر ولا هستنكر إننا شعب عنده شعرة.. “ساعة تروح.. وساعة تيجى”.. لكن ماإحناش مجانين ياخويا.. آه والنبى.. الحقنى يا عم فرانكشتاين.. آدي اللي كان ناقص.. آه يا بُقى يانى يابا.. يااللا بقى.. سلامو عليكووووووووووووووووووووووو
