أمنية الجندي تكتب: الانتظار
رحلتنا حياة
وحياتنا كئوس
وبنشرب منها وجع ومرار
الانتظار
شربت من كاس الانتظار
وسقفت بيه
مش حب فيه لكن..
"ليس على السكران حرج حتى يفيق"
والانتظار خمرة
والمنتظر سكران
والله مش ندمان
إني سكرت في يوم
والله مش فارقه
جوايا فيه حرقة
وفيه شيء من الجرأة
الانتظار فرقه
بتزود المسافات
بستني ليه في حاجات
اصلا مهيش ليا
عارفه اني مش ليها
الانتظار سكة
ومشيت انا فيها
تعبت خلاص رجلي
مقصدشي اني وقعت!
ولو وقعت هقوم
زادت في قلبي هموم
مليت خلاص منها
م الانتظار مليت
وبجد انا حنيت
للضحكة والتفاصيل
كل القلوب بتميل
وبتبقي روح واحدة
مشاعرنا ليه جاحدة؟
بنداري ليه فيها!
في التقل ليه بنزيد
وليه مخليها...
لو بس تظهر يوم
تبقي انتهيت بيها
بنداري ليه فيها
ده الميزة في ظهورها
والجرأة للعظماء!
والتقل مش صنعة
بالغنا ليه بيها؟؟
قلبي عليه جمرة
الانتظار خمرة
ومحرمة الخمرة
ومحرم الكتمان
والله مش ندمان
اني سكرت في يوم
عقلي صبح مجنون
انا ندمي لو هيكون
هيكون على التفكير
بررت ياما كتير
مليت من التبرير
وشبعت م الحرمان
المنتظر سكران والانتظار خمرة
ومحرمة الخمرة
لكن مباحة لناس
غاوية تعيش في عذاب
كل اللي داق طعم الوجع
علم في قلبه وغاب
بنخاف من الرجعة
الانتظار بدعة..
وكل بدعة ضلال
يا ايها الأحرار
متقيدوش روحكو
بشيء مهوش ليكو
أو حتى صعب يكون
لو ليك نصيب في الشيء
هتكونله يوم هتكون
الانتظار مجنون
عمره م علم صبر
ولا كان ناتج عنه
مين اللي قال أنه...
الصبر دايما مصطحب بالانتظار؟
رغم أنه صبر جميل
لكن اصله مرار
