مصطفى الرومانسي يكتب: «صحيح أنا جاي دلوقتي»

صحيح أنا جاي دلوقتي 
أزورك وأدعي ليكي كتير

- مفيش ولا حضن يشبهلك
في بُعدِك حُضنُهم مسامير

معادش أمان..
ومابحسوش
لأني حقيقي معرفهوش
مجربتوش.. في دنيايا
غير أما كبرت أنا فحُضنِك
فقدته حقيقي من بعدك..
وهعمل بالوصية أكيد
وهاخد بالي من روحي
وحاضن روحك الدافية
وهوصل بيها لطموحي

وهافضل بّرضُه أفضفضلك
وأجيلك وأحكي أحوالي
وعمري ما هقطع الزيارات
وأشيلك لحظة من بالي!
..
مفيش أصعب من إنك يوم
تِزور إنسان.. وماتشوفهوش
وتِشكيلُه الحياة بَعدُه
وتِحكيلُه.. وما تُحضُنهوش..
مفيش أحزن من الفُرقَة
ومالروح اللي عايشة معاك..
ومالشوق اللي ينزل دمع
وميت بس من جواك..
ومُتردِد ما بين تِمشى
وبين خليني هِنا وياه..
- يكون هايِن عليك تِنزل..
- تعيش في القبر تحت مَعاه 💔!