البااارلمنجي: «بقينا وسط العرب معيرة.. أولادنا بيحاربوا الإرهاب ونائبنا بيضرب مرة»
في الوقت اللي بنفتخر فيه بأبنائنا اللي بيستشهدوا دفاعا عننا من غدر الإرهاب، وإذ فجأة نلاقي نائب دايرتنا رايح يتشطر على واحدة ست ويضربها بالقلم على وجهها.
وفي الوقت اللي أبناء البلاد اللى حوالينا، بيحسدونا على كون معظم الشهداء من المجندين هم زهرة شباب دايرتنا، نفاجأ الآن بهم بيعايرونا بسبب نائبنا الهمام وتصرفاته اللي بتجيب لنا الكلام.
وأنا جمعتكم النهارده يا أهالي دايرتنا الكرام علشان أسألكم سؤال واحد بس.. هو إحنا لغاية إمتى هنفضل نتهان بسبب تصرفات نواب دايرتنا؟!
واحد منهم كداب وبتاع إشاعات والتاني بيضرب ستات، والتالت مقضيها أفراح وعزاءات.. وأنا بصراحة بشد في شعري من تلك التصرفات.
طب يعنى إيه لما نائب محترم بيمثلنا كلنا ياخد بعضه ويضرب موظفة ويهينها أمام زملائها وكل الموجودين من غير زملائها؟!
طب ده يعني ضربها بالنيابة عننا بصفته نائبنا ولا هو كان بيعبر عن نفسه فقط كما يردد دائما، عندما نعترض على تصريحاته بخصوص غلاء الأسعار اللي بيعتبره أمرا عاديا وطبيعيا ولازم الشعب يستحمله؟!
طب والعلقة اللي أكلها من طلاب الجامعة الذين غضبوا للفتاة.. هل أخذها بالنيابة عننا فنذهب لنثأر له.. أم أخدها ممثلا لنفسه كعادته كما يصرح دائما بأنه يمثل نفسه؟!
طب ليه في الوقت اللي أبناءنا من شباب الدائرة بيستشهدوا دفاعا عن الوطن وإحنا بنفتخر بهم أمام الدوائر الأخرى يقوم نائبنا يتشطر على واحدة ست ويضربها على وجهها ؟!.. هو إحنا من إمتى بنضرب ستات يارجالة؟!.. حد يجاوبني يا جدعان علشان أنا في حالة توهان.
طب أنتم فاكرين لما عبلة حبيبة عنترة بن شداد قالت: «بقينا وسط العرب معيرة.. العبد يحمي الحما والحُر يضرب مرة»؟!
أهو إحنا بقى اللي «بقينا وسط العرب معيرة.. أولادنا بيحاربوا الإرهاب ونائبنا بيضرب مرة».
وآدي نتيجة اختياراتكم لنوابكم.. اشربوا بقى
مع تحياتي: أخوكم «نزيه صندوق عبد المتعال الناخب».. الشهير بالبااارلمنجي.. نائب ساقط ببرلمان 2016.
