البااارلمنجي: نائبنا الهمام جايب لنا الكلام

المفروض أن النائب البرلماني بيبقى هو لسان حال دائرته التي انتخبته.. يعبر عنها ويتصف بصفاتها.. يعني ماينفعش يكون نائبا كذابا.. لأنه يمثلنا سواء تحت قبة البرلمان أو حتى على المقهى الذي يجلس عليه بوسط البلد.

وأنا جمعتكم النهارده يا أهالي دايرتنا الكرام علشان أقولكم إن سيادة النائب بتاعنا أصبح يهرتل بالكلام سواء على مقاهى وسط البلد التي يرتادها، أو داخل قبة البرلمان، أو حتى على صفحات الصحف وشاشات الفضائيات، وإحنا بقى مش ناقصين كل شوية حد ييجى يقولنا الحقوا النائب بتاعكم بيهرتل بالكلام.

يعنى مثلا يرضيكم أن نائبنا يقول في الصحف إنه استطاع أن يحصل على موافقة الحكومة بإنشاء مصنع سكر جديد بالمحافظة، وأن كل عمال المصنع سيكونون من دائرة سيادته؟!.. وطبعا الكلام ده أغضب الأهالي في باقى دوائر المحافظة، لأنهم منتظرين المشروع ده من زمان هم وأبناؤهم.. فمن المعروف أن مصانع السكر تستوعب الآلاف من العمال والمهندسين والمحاسبين والإداريين.. يعني هتبقى هيصة ياعمدة.

عموما مش دي المشكلة.. المشكلة إنه مافيش مصنع أصلا ولا فيه موافقات ولا دياولوا.. يعني نائبنا الهمام دايما بيجيب لنا الكلام.. وزي ما بيقولوا عندنا في البلد «ولا منه ولا كفاية شره»، وبالمناسبة.. نفس نائبكم هذا هو الذي يصرح ليل نهار بأن الحكومة بتعمل اللي عليها، ولازم الشعب يستحمل شويتين.. أي والله شويتين مش شوية واحدة.. بصراحة حاجة تحرق الدم جعلتنا نستحق كل ما نتعرض له من سخرية وانتقاد ولعان وسباب.. أما سيادة النائب نفسه فيستحق أكثر من ذلك.

حد هيسألني: طب هو يستحق الشتيمة علشان هو راجل كداب ولسانه متبري منه.. إحنا بقى نستحق الشتيمة ليه؟!
وأنا هرد عليك وأقولك: لأنك أنت الذي انتخبته ليمثلك أمام الناس وأمام البرلمان.. وهذه هي نتيجة اختياراتكم.. اشربوا بقى.

مع تحياتي: أخوكم «نزيه صندوق عبد المتعال الناخب» الشهير بالبااارلمنجي.. نائب ساقط ببرلمان 2016.