استياء أهالي الوراق من نقل موقف الأتوبيسات: «ارحمونا»
"الناس كلها في الوراق مستاءة من قصة نقل أتوبيسات النقل العام من موقف الوراق إلى موقف بجزيرة محمد".. شكوى أطلقها أحد أهالي الوراق ليعلن غضبه من نقل مكان موقف أتوبيسات الحي، مبررا ذلك بأن تعداد أهالي الوراق الذين يستقلون وسائل مواصلات النقل العام في الوراق يوميا يصل لنحو نصف مليون نسمة.
ويضيف أحد سكان الوراق: "الستات الصبح بتتبهدل عشان تستني أي خط من الأربع خطوط بتوع الأتوبيس، دة غير إن الأتوبيسات عددها محدود جدا، وتعداد السكان في الوراق يفوق جزيرة محمد، فلما الأتوبيس بيجي زحمة من الجزيرة محدش بيعرف يركب".
وتابع: "دة طبعا ضرر كبير عشان سواقين الميكروباص بقوا بيستغلوا الناس بالأجرة الزيادة، وناس كتير مبتروحش في مواعيد العمل، وطلبة المدارس بتروح متأخر وعايشين حالة صعبة جدا".
أثار حديث أهالي الوراق غضب أهالي جزيرة محمد، واعتبروا أن نقل موقف الأتوبيس إليهم يساعد في خدمة الجميع دون ظلم لأحد، خاصة وأن الجزيرة بها ساحة واسعة تصلح لإقامة الموقف عليها، كما أن الأتوبيسات كانت لا تصل إليهم، ويضطرون لإستقلال أي وسيلة نقل فردية "توكتوك" على سبيل المثال للوصول إلى الوراق واستقلال الأتوبيسات منها.
فيقول محمد شحاتة: "أهالي الوراق زعلانين إن الموقف اتنقل، طيب وبتوع جزيرة محمد يعملوا إيه.. ياخدوها مشي.. بدل ما تطالبوا بزيادة عدد الأتوبيسات وإنشاء موقف خاص للاتوبيسات وإيجاد حل لباصات المناشي اللي موقفة الدنيا في المرور.. بتطالبوا بسحب الكام أتوبيس اللي في جزيرة محمد!!!"
بينما قال محمد البطل، أحد أهالي جزيرة محمد: "متضربونا بالنار أحسن، أتوبيسات جزيرة محمد هتفيد الجزيرة والوراق، لكن أتوبيسات الوراق بتفيد الوراق بس، وعشان نركبها لازم تخرج بدرى يا تمشي يا تركب توكتوك ب٦جنيه يجيبك الوراق عشان تركب اتوبيس ب١.٥٠، يبقى انتوا هتخسروا ايه لما تبقي عندنا، طول عمر جزيرة محمد عايشه على بواقى الوراق من مرافق وخدمات وكل حاجه تتعمل في الوراق تتعمل بعدها بسنين في الجزيرة.. ارحمونا يرحمك الله"
أما أحمد سفيان فيقول: "طيب متيجي نخرج برا الصندوق ونطلب بمد مترو الأنفاق أحسن ولا مش في الطموحات بدل ما عمالين نتخانق على أربع خطوط أتوبيس مش سدين العجز وناس تقول لا الجزيرة وناس تقول لا الوراق".
