معتز عبد الفتاح: رئيس الوزراء مش حاسس بمشكلات المواطنين
قال الدكتور معتز عبد الفتاح، أستاذ العلوم السياسية بجامعة القاهرة، إن هناك استثمارات قيمتها 45 مليار جنيه في مشروعات قائمة وجار استكمالها، متابعا: «العجلة بدأت تدور، لكن في حالة من استغضاب المصريين من قِبل المسئولين، وحالة استدعاء للغضب، بسبب حاجات المفروض يعملوها ومش بيعملوها».
وأضاف «عبد الفتاح»، خلال تقديمه برنامج «حلقة الوصل»، عبر فضائية «أون لايف»: «رئيس الوزراء مش بيجتمع بوزراء اللي بيتعلق بيهم مشكلات المواطنين اليومية، لأنه مش حاسس بده، لو نزل يطلع رخصة بنفسه هيحس، لكنه هيكلم وزير الداخلية يخلصله الموضوع».
وتابع: «أما المسئولين يشتغلوا 3 شيفتات ويوفروا للناس خدمة أفضل زي ما بيحصل في المشاريع الجديدة، ليه الشهر العقاري مثلًا يقفل؟ ما يفضل مفتوح على طول إيه المشكلة؟ ليه تطلعوا عين الناس؟ ما تدفعهم فلوس أكتر مقابل توفير خدمة أفضل».
استكمل أستاذ العلوم السياسية: «جالنا 15 مليون طفل من 2011 لدلوقتي.. وفرنا كام فرصة عمل بقى؟ بلاش نضحك على نفسنا، الدولة محتاجة وقفة مع الذات، معرفش ليه في ملفات لم تُفتح حتى الآن، وعدم فتحها هيخلي الإنجاز مش باين، في إنجازات في عدد من الملفات، وعايزين الناس تحس بالإنجازات بقى».
واستطرد: «صمود الشعب حتى الآن يؤكد أننا فينا حاجة صح، لكن لازم نتحرك بسرعة، اللي حوالينا بيطيروا، مينفعش نبقى بالبطء ده، القانون موجود عشان ينظم حياتنا، مش عشان يخنقنا».
