نصر فتحي اللوزي يكتب: غريب

من قبل ما أعرف الكتابة
حفر الزمن على قلبى
أنين الربابة
من قبل ما أعرف القراية
نقش الزمن على جسدى
حروف
مش رواية
ولا كان ناوي يحكيلي حكاية
ولا كان عايز يقوللي
انت غريب وللأحزان مراية
ولما علمتني الأيام
حروف
قريت نقش الزمن على جسدي
صفوف
جواها ألوان قوس قزح
تاهت
ماعدا لون ظلام الليل
مكتوب عليه هي دي
الظروف
وخطوة بتسلم خطوة
زحمة
من غير ما أشوف
أو حتى أعرف كلمة
خوف
كنت خايف من قبل
ما أعرف الحروف
اللي حضنت بعضها
بقت وشم على عينيه
رسمت كسوف
وطال الليل مع الخسوف
قبل السطر الأخير
عرفت إنى مش تايه
أنا عند الزمن أجير
كتب على جسدي
أنى للقدر حبيب
والقدر قبل ميلادي نصيب
وتحركت كل الحروف
صرخت قالت اقرأ
من غير خوف
دا انت مع الأيام نجيب
من غير آه أو حتى نحيب
واتجمعت كل الحروف
رسمت سهم في القلب
يصيب
بريشة الزمن
إنى أنا في الدنيا
عنها وفيها عن كل الوجوه
غريب
سطرت دموعي حلم مستحيل
زى عش أبات فيه فوق النخيل
مكتوب في أول سطر
ياريتنى ماعرفت القراية
ولا كانت لى بداية
ياريتك ياغريب
كانت بدايتك
نهاية