النفسنة والحسد يسيطران على النشطاء بسبب زواج رمضان صبحي.. على: 19 سنة وبيتجوز وجايب عمرو دياب في الفرح.. إسراء: صغير ومعاه ملايين.. ماريا: بحقد عليكي يا حبيبة.. وإسراء: عنده موهبة
حالة من الحسد والنفسنة ظهرت في كلمات نشطاء مواقع التواصل الاجتماعي، بسبب زفاف لاعب المنتخب ونادي ستوك سيتي الإنجليزي رمضان صبحي وحبيبة إكرامي، ودشن النشطاء هاشتاج "رمضان صبحي"، الذي احتل مركزًا متقدمًا بتراند مصر على تويتر.
وعبر النشطاء من الفتيات عن إعجابهم برمضان صبحي، وحزنهم على زواجه من أخرى، في حين ذكر البعض أنه لا يزال صغير السن وتزوج، بينما أكد نشطاء من الشباب أن حبيبة إكرامي مثال للزوجة الجميلة رفيعة الأخلاق.
مستغربة
قال على زياد: "19 سنة وبيتجوز وجايب عمرو دياب في الفرح وبيلعب بالدوري الإنجليزي وأنا 21 سنة وأهم إنجازات حياتي إني جبت 60 في الأحياء في الثانوية".
وأضافت إسراء رسمي: "مستغربة الناس اللي عمالة تقول دة صغير وجايب الهضبة ومعاه ملايين.. دي أرزاق ربنا موزعها هنبص فيها! ربنا يتمملهم على خير".
عنده موهبة
وعلقت إسراء حسن: "رمضان صبحي.. الناس اللي عماله تقول سنة كذا وبيتجوز وبيلعب في الدوري الإنجليزي ومرتبه كذا مالكوا انتوا ما تخليكوا في حالكوا عنده موهبة".
وردت سلمى: "رمضان صبحى.. يبقى تريندنج ليه يعنى عشان بيتجوز يعنى هو عمل إنجاز أنه حيتجوز؟ يلا مبروك عقبال البيبى عشان نتريندنج تانى"، وتابع عصام النمر: "وأنا قاعد بتفرج على رمضان صبحي وهو بيتجوز وهو قدى في السن وأنا لسه بحسب درجات النجاح والرأفة علشان أعدى".
بودعك
وقالت شيماء عواد: "رمضان صبحي.. ابن النادي بارابابابا.. مبروك يا كراش يا حب عمرري.. وسمعني سلام بودعك".
وأضاف ماندو: "رمضان صبحي.. السنه اللى فاتت زى دلوقتى كان مستنى نتيجة الثانوية العامة.. ما شاء الله إمبارح فرحه".
وعلقت ماريا ميمو: "فرح رمضان يعني عندي عريس النهاردة.. ربنا يتمملك بخير.. ولسه بحقد عليكي يا حبيبة.. وتفضل دايما متألق يارب"، ورد محمد الملحتني: "رمضان صبحي.. يارب فرحة زي دي.. يارب فرحة.. أحسن ما في الصوره حجابك يا حبيبة والابتسامه اللي من تحت لتحت دي".
وتابع محمد زهران: "أنت ممعكش فلوس زي رمضان علشان كدة يوم القيامة مش هتتحاسب حساب رمضان، ولما تتسأل عن مالك فيما أنفقته هتعرف ترد لأن مالك كان قليل".
قمة الجمال
وقال سان يوسف سلفاتور: "رمضان صبحي ويجى عيل صغير المفروض يقولى يا عمو ويسبقنى ويتجوز وأنا لسه سنجل".
وأضاف شريف على: "البنت الجميلة مش محتاجة تظهر جسمها عشان تثبت جمالها.. حبيبة إكرامي.. قمة الجمال، قمة الاحترام"، وعلق سيد أسامة قائلًا: "بيتجوز في نفس الوقت اللي أنا قاعد بعد فيه درجات الرأفة".
وتابع بيسو: "رمضان صبحي ومحدش يقول صغير دة رزقه.. وبعدين في بينه وبين حبيبة حب، ودة احسنله أنه يتجوز بدرى عشان يستمتعوا بحبهم ربنا يحفظهم بجد حلوين".
