صلاح عبد العزيز يعزي الشعب في ضحايا المنيا بقصيدة «قتلوا الزايرين»

اركن... (ركن)
انزل... (نزل)
- هات البطاقة
- اهِهْ
- مين دول معاك؟
- دول ناس يا بوي زايرين
- رايحين لمين؟
- رايحين نزور الدير، ما هو احنا مسيحيين!
لا مؤاخذة مين انتم وليه متلتمين
وايه السلاح دا يا عم!!
طب ليه كلامك ريحته دم؟
- بطل كلام
اطلع ونزلهم طابور
خلّص قوام!
********************
- جرى ايه يا جرجس ليه وقفت؟
مين دول وليه وشك سواد؟
شايلين سلاح ليه دول يا واد
لا يكون كمين؟ طب فيها ايه؟
مش رخصتك ويّاك؟ ما ترد ياد!
- هاتوا البطايق وانزلوا واقفوا ف طابور
- طابور ايه يا واد؟ هو احنا رايحين الطابونة؟ قال طابور!
- اسمعني يا جدي !
هاتوا البطايق وانزلوا
علشان نعدي!
*******************
واقفين طابور..
واتسرب الخوف للصدور
ممكن يا باشا تعرفونا الوضع ايه؟
عملنا ايه علشان نقف وسط الطريق
ونزلنا ليه؟ معلش برضك وانتوا مين؟
ليه السلاح عمران يا ولد العم!
إياك تسيّل يا ابن آدم دم!
*******************
من غير كلام كان الرصاص الرد
يا نهار ندم!
وسط الطريق كله اتعدم!
والأسئلة اللي من الأزل بتجول؟
من أول التاريخ؟ مين المسئول؟
*
*
*
الأمـــن لـمـا غــاب... كــان الـسـلاح حـاضـر
وف ضِل عيشة الغاب... الموت ماهوش صابر
يــا بـلادنا لـو تـكتبي هـنكونوا فـي مـدادك ؟
يــــا مـسـالـمـة لـلـعـالـم ومــعـاديـة أولادك!
كـفـرنا بـيـكي وطـن يـا الـلي الـفساد شـلّك
أنــا قـلـتلك مـن زمـان احـنا الـلي فـاضلينلك
اهـو رحـنا زي مـا راح الـلي اخـتفوا ف سـينا
لـــو مــش هـتـاخدي الـتـار حـسـي بّـلاويـنا
لـــو مــش هـتـاخدي الـتـار حـسـي بّـلاويـنا