بهلول المشغول: تحيا مصر ولو نموت

يا كفوف ولادنا الصغيرين
يا أمل باقى السنين
رحتوا المدرسة تتعلموا
وللا رجعتوا مسمومين؟!

مين السبب في البهدلة
مين هو صاحب المسألة
صاحب لمصنع تغذية
ولا اللى ناقص مرجلة؟!

جايز اللى ناقص دا وزير
أو حتى ناظر أو مدير
أصل اللى يخون أطفال بلاده
يبقى مالوش في أهله خير

مين اللى قلبوا بيشتغل
طاوعو يقتل فينا الأمل
لجل مكاسب أو مناصب
لجل الطمع فيه اكتمل

يا ولاد بلدنا الطيبين
يا صغيرين يا مسمومين
مصر بكره تبقى أحلى
لما نزيح الطماعين

ريسنا قالها بعلو صوت
عمر الأمل ما يوم يموت
تحيا مصر تلات مرات
تحيا مصر ولو نموت