بهلول المشغول: إحنا الشعب ابن اللئيمة
مش متأثر مش مقهور
عادى واللى يغور يغور
هدفع كل المطلوب منى
وباقى الشهر أعيش معذور
ّتمن الحاجة بقى ضعفين
وآدى الأزمة لها سنتين
قالوا استحمل ست شهور
بدل الستة صبرت عامين
مش راح اصدق تانى كلام
ولا هننتقد بأى ملام
علشان أبقى من الشرفاء
هربط بطنى بألف حزام
هنسلف بعضينا كمان
والشبعان يدى الجعان
نحمد ربنا وبيكفينا
إننا عايشين في الأمان
أهم حاجة تكون مبسوط
يا وزيرنا يا فطفوط
ونائبنا مرتاح البال
بيشرب القهوة المظبوط
إحنا الشعب ابن اللئيمة
نستاهل حتى الشتيمة
كان لازم نستحمل أكتر
وما نطلبش عيشة كريمة
وآدينى يا حكومة بأحلف
إنى من غيرك بتشحتف
ولو زعلتك منى يوم
اعتبرينى جاى أتاسف
