نشطاء يسخرون من سيدة تطالب بعدم المغالاة في راتب الخادمة الفلبينية.. صبا: الموضوع بقى تو ماتش يا أبلتي.. محمد: أنا فلبينية على فكرة.. رفاعي: الناس مش لاقيه تاكل

أطلقت سيدة تدعى شيرين إسماعيل ثابت، دعوة عبر صفحتها على موقع التواصل الاجتماعي «فيس بوك»، تطالب فيها الأسر المصرية بعدم المغالاة في رواتب الخادمات الفلبينيات.

وقالت شيرين: «نداء لكل ربة أسرة مصرية لا تدفعوا للفليبينية أكثر من ٥ آلاف جنيه، أرجوكم كفاية سفه، يعني إيه الفلبينية مرتبها في مصر وصل ٧٠٠ دولار، أو ما يوازيها، بعد التعويم، الرحمة، رمضان داخل علينا، وكلنا محتاجين خدمة، تكاتفوا يا سيدات مصر المحترمات ضد مافيا الخادمات».

وانهالت تعليقات المتابعين لـ«شيرين»، على المنشور، ما بين التهكم والسخط والرفض، «فيتو» ترصد التعليقات وردود الأفعال في السطور التالية:

موضوع حيوي
عبر «رفاعي» عن غضبه، قائلًا: «دا معندهمش إحساس بالناس.. دي الناس مش لاقيه تاكل، وهما بيتكلمو عالخادمات بـ 700 دولار.. بيبصوا في رزق الفلبينية ياعم»، فيما تهكم أحمد قائلًا: «موضوع حيوي برضو يا طنط».

تسيب واستهتار
وسخرت «صبا» قائلة: «آه والله يا أبلتي الموضوع بقى تو ماتش!»، وقال محمد: «أنا فلبينية على فكرة»، فيما علق عبد القادر: « يعني إيه الفلبينية مرتبها في مصر يوصل 700 دولار؟ دا تسيب دا استهتار.. أنا أعرف عدد لا نهائي من الدكاترة معندهمش مانع يشتغلوا الشغلانة دي بنص الرقم ده».

وقال محمود: «اللي يشوف بلاوي الناس تهون عليه بلوته»، فيما علق صلاح: «كويس إني عرفت المعلومة دي عشان اشتغل فلبينية».

عنيا مشدودة
وقالت آلاء: «أنا مصرية وعنيا مشدودة شوية، ينفع آجي اشتغل؟ اعتبريني فلبينيه يا أختي!»، وقال ناصر: «والنبي تشغليني بدل الفلبينية، أبويا طلع معاش مبكر، وأمي ربة منزل مبكر، وأنا عاطل مبكر، والنبي تشغليني اعتبريني موزمبيقي حتى بعشين جنيه، مش هقول لأ والله».