حسام الشرقاوي يكتب: هات مهندس
ناس كتير لما بيجيلها دور برد مابتروحش لدكتور.. بتروح للصيدلي وتطلب أي دوا للبرد.. بعضهم عشان يشتري دماغه وبعضهم عشان يوفر 100 جنيه الكشف.
نضطر غصب عنا فقط، نذهب للطبيب المتخصص حين يتملكنا الشعور بالتعب الحقيقي، نفس الكلام ينطبق في أغلب تفاصيل حياتنا.. وبما إننا شعب فهلوي بطبعه، فأغلب الناس عندما يقرروا بناء قطعة أرض أو تشطيب شقة مش بيجيبوا مهندس متخصص.. ويقولك «هو هيعمل ايه يعنى».
للأسف الشديد الناس دي فاهمين الموضوع غلط تمامًا.. لأن اللي يلجأ لمهندس متخصص يشرف ويتابع شغل التنفيذ لبيته سواء خرسانات أو تشطيبات هيكون هو الكسبان.. طب إزاي..
نجاح أي شغلانة في الدنيا بيعتمد على تحقيق 3 عوامل أساسية مهمة «الجودة والوقت والتكلفة» يعني لازم نوصل لأعلى جودة ممكنة بأقل تكلفة ممكنة وفي أقل وقت ممكن وده اللي مستحيل يحصل في حالة عدم وجود مهندس متخصص فاهم وشاطر وعنده ضمير.
تعالى نحسبها ونشوف إيه اللي ممكن يحصل لو العميل شطب شقته أو بنى بيته بدون مهندس:
1 بالنسبة للجودة.. طبعًا العميل ماعندوش خلفية إزاي ممكن يستلم البنود بعد ماتخلص، ممكن يجتهد في ده ولكن مستحيل يعرف يستلم زي استلام المهندس، وطبعًا الصنايعي لو فهم إن العميل مش فاهم هيشتغله وتبدأ تظهر العيوب مثل نشع المية وتسريب من السباكة وشروخ البياض وتقشير الدهانات... إلخ، ده غير لا قدر لله لو ظهرت عيوب إنشائية زي ترييحات المباني مثلًا..
2 بالنسبة للوقت.. فيه أسطورة كل المهندسين عارفينها بتقول إن أي صنايعي بيحصله على الأقل 3 حالات وفاة لناس قرايبه في كل شغلانه.. وعد بقى عندك الحجج الوهمية اللي مابتخلصش.. مرة يقولك أصل ابنه تعب ومرة يقولك أبوه دخل الجيش.. وفي الحالة دي مابيعرفش يتعامل معاه غير مهندس تربية موقع بيقوله كلمة السر في التليفون يخليه يحضر فورًا، فتأكد إن الشغل اللي مافيش مهندس بيتابعه بيخلص في أضعاف الوقت..
3 بالنسبة للتكلفة.. للأسف الشديد كتير مقتنعين إنه لو مجابش مهندس فهو كدة ناصح ومدقدق وهيوفر فلوس.. أحب اقولهم لا إنت لو ماجبتش مهندس تأكد انك هتدفع فلوس أكتر لأن المهندس هيقدر يجيب الصنايعية بأسعار أقل من اللي انت هتجيبها وحتى بعد مايحط نسبة الربح بتاعته هيكون السعر أقل.
المهندس ليه علاقات ومعارف ويعرف يجيب كل خامة منين بأرخص سعر.. ويقدر يحسب الكميات اللي محتاجها من كل خامة بدقة فمش هيكون فيه هالك، ده غير إن الشغل هيتعمل صح من أول مرة.
الخلاصة.. هات مهندس
