بهلول المشغول: أنا عايز بس كرسي
سايبين ورانا الهموم
وع الدايره جينالك
علشان تنصفنا يوم
وقلوبنا ندهالك
يا واخد أصواتنا منا
بطريقه والتانيه
شيل الهموم عنا
ولو يدوب ثانيه
احمل متاعب زمن
زى عشمنا فيك
واعرضها من غير تمن
ع الوزرا من حواليك
دا انت اللى قلت يوم
أنا عايز بس كرسى
في البرلمان لو يوم
علشان مراكبنا تمشى
ووعدتنا مية وعد
بالعدل والحريه
إنك تجيب السعد
لأهل الدايره ديا
أتارينا كنا محطه
حطت عليها رجلك
نفذت بينا الخطه
وقلت يلا نفسك
لا شلت يوم همومنا
ولا جيت حدانا الدار
شايف أوجاع قلوبنا
وعذابنا م الأسعار
