البااارلمنجي: نائب خلف خلاف.. باع حزبه وراح للائتلاف
هو إحنا ليه بقينا كده.. حتى نواب دايرتنا مش قد كده.. النواب بتوع دايرتنا بيعاملونا وكأننا بنشحت منهم حقوقنا.. وخاصة نائبنا «الجنرال» اللي مش فاضي لنا ولا لمشاكلنا وكأنه وصل للبرلمان ببركة دعاء الوالدين.. الله يلعنها القوائم الانتخابية.. اللي خلت النواب حاسين إنهم نجحوا بالتزكية.. وحاسين إن الانتخابات كانت تحصيل حاصل.. وأنهم سواء بنا أو من غيرنا ناجحين ناجحين.
وأنا بقى جمعتكم النهاردة يا أهل دايرتي الكرام علشان أكلمكم عن نائب دايرتنا الجنرال.. اللي من خلال الحزب وصل للبرلمان.. وبقى كبير نواب الحزب كمان.. وبيتكلم هناك عن «حقوق الإنسان».. طب أي إنسان وأنا ابن دايرتك تعبان.. غلبان.. بيبات جعان.
نائبنا سايبنا عرضة للغلاء.. و مبقناش عارفين إن كنا انتخبنا جمال واللا انتخبنا «علاء».. وربنا يرحمنا من شر البلاء.
بس إحنا ورانا رب كريم وجبار.. وهنفضل دايما «مصريين أحرار».. وحقوقنا هترجع لغاية الدار.
سعادة النائب بتاع دايرتنا باعنا يا جدعان.. زي ما باع حزبه كمان.. والغريب أنه عايش في دور الواعظ الـ «عابد».. وعايز صورته تترسم ع المعابد.. مع أنه نائب اتنين في واحد.
نائبنا خلف خلاف.. باع حزبه وراح للائتلاف.. وساقوه لحرب خفية.. ونسى فكرة «الليبرالية».. اللي على أساسها انضم للحزب التكية.. قبل ما يبيع القضية.. ويبيع همومنا المنسية.. ويتفرغ لحرب بالإنابة في الصحف والقنوات الفضائية.. على اللي كان السبب في وصوله للعضوية.
عموما يا أهل دايرتي اشربوا بقى.. علشان تعرفوا نتيجة اختياراتكم للنواب اللي ناسيين همومكم ومأساتكم.. وتركتموني أنا حامل أناتكم وآهاتكم.. ابن دايرتكم اللي طول عمره عايش بيناتكم.. واللي استكثرتم عليه أصواتكم.
مع تحياتي: أخوكم «نزيه صندوق عبد المتعال الناخب» الشهير بالبااارلمنجي.. نائب ساقط ببرلمان 2016.
